BAUKAU , STLTIMORLESTE.com – Veteranu Antonio da Costa “Derok Masin” husu Governu atu liberta povu ho dezenvolvimentu infraestrutura bazika, nunee sira bele hetan benefisiu.
Nia dehan, loron 20 Agostu nee sei selebra ezistensia FALINTIL ba dala 50 hanesan membru FALINTIL, uluk nian laiha duvidas ba ida nee no selebrasaun nee, nuudar fanu memoria levantamentu Frente Armada hasoru kolonial Português hodi hasai husi Timor.
Nunee FALINTIL inisiu ba Indepedensia iha loron 20 Agostu no re-organiza aan iha 28 Novembru hodi proklama Indepedensia Unilateral, maibe Indonezia la satisfas ho Timor nia ukun Aan, nunee invade Timor iha loron 07 Dezembru 1975.
Mezmu invazaun Indonezia nian iha Timor ho material funu, maibe FALINTIL reziste funu hasoru Indonezia liu husi Ordem Komando da Luta ba FALINTIL sira iha momentu neeba.
“Ho tinan 50 ida nee ba ami hakarak haree dezenvolvimentu nia progresu, tanba agora la koalia ona ba kona-ba libertasaun da patria, agora ita koalia kona-ba libertasaun povu, tanba nee se deit mak sae ba kaer Governu, tenke iha teoria politika iha nia ulun kona-ba dezenvolvimentu ba nasaun ida nee implementa ba Povu,” hateten Derok Masin ba jornalista sira, iha Vila Antiga, Buakau, Segunda (11/08/2025).
Veteranu nee afirma, durante inisiu ukun aan too ohin loron, mezmu Governasaun troka malu too ona dala 9 dezenvolvimentu lao, maibe neineik no kauza husi neineik lakohi fo sala ba ukun nain sira, maibe nafatin husu fo liman ba malu hodi liberta Povu ho dezenvolvimentu, tanba patria liberta ona, maibe povu sei moris ho mukit liu liu sofre ba dezenvolvimentu hanesan infraestrutura bazika sira neebe iha baze sei hakdasak.
(tom)
