DILI, STLTIMORLESTE.com – Komisaun Rekrutamentu Kadetes foun Polisia Nasional Timor Leste (PNTL) klarifika katak, iha kriteria neebe aplika idade 18 too 23 laos desizaun mai husi Komando PNTL, maibe desizaun mai husi Governu.
Lia hirak nee hatoo husi Portavos Komisaun Rekrutamentu Superintendente, Antonio da Luz ba jornalista sira iha Sentru Formsaun Polisia Komoro Dili, Sesta nee (08/08/2025).
Nia dehan, Parlamentu Nasional (PN) bele kestiona ho kriteria idade 18 too 23 laos husi Komando PNTL, maibe mai husi Governu liu husi diploma ministerial.
Nia tenik, prosesu rekrutamentu PNTL foun bazeia ba diploma ministerial nu.17/2025 iha artigu 20 no 22 koalia kona-ba kondisaun admisaun jeral nian iha pontu 12, ida mak sidadaun Timoroan duni no domina lian ofisial no solteiru no iha remata sekundariu no idade 18 too 23.
Nia esplika, desizaun deside kriteria idade 18 too 23 kompotensia tomak iha Ministru Interior aprezenta iha Konselhu Ministru mak deside.
“Neebe idade nee laos Komando PNTL mak tau, se komando PNTL mak tau hakarak too idade 25 too 27, maibe tanba deside husi ita nia nai ulun sira neebe hatur iha diploma ministerial. Ida nee mak hakarak klarifika ba publiku, tanba PNTL la inventa idade, maibe ami halao servisu bazeia ba lei,” nia informa.
Nia fundamenta katak, PNTL hanesan ekipa tekniku idade neebe mak atu halao prosesu rekrutamentu PNTL foun ne’e tuir diploma ministerial.
Molok nee, Deputadu sira iha PN liu husi Bankada Partidu Demokratiku (PD) kestiona ho kriteria neebe Ministeriu Interior no Komando Jeral PNTL aplika hodi rekruta kadetes polisia foun iha tinan 2025, tanba autoriza deit joven idade 18 too 23 maibe taka dalan ba sira neebe idade 24 too 27.
Xefe Bankada Partidu Demokratiku, Deputadu Manuel Henrique Noronha hatete, bazeia ba despaisu husi Ministeriu Interior (MI) neebe fo sai ba Komisaun Rekrutamentu atu halo rekrutamentu ba membru polisia foun iha tinan 2025 sei tau prioridade liu ba Timoroan sira neebe ho idade 18 to 23. Tuir lo-loos Ministeriu Interior ho Komando PNTL fo oportunidade ba Timoroan sira feto ho mane neebe idade husi 18 to 27 hodi konkore iha vaga nee, tanba sira antes nee prepara ona dokumentu.
“Maibe realidade iha implementasaun halo deit rekrutamentu ba ita nia joven sira neebe mak ho idade 18 to 23, maibe ida idade 24 too 27 labele simu,” katak nia.
Nia sublina, bazeia ba despaisu no informasaun neebe mak Governu fo sai joven barak mak hein hodi trata dokumentu sira hanesan bom komportamentu prienxe kriteria hodi kompete iha vaga nee, maibe realidade mak hatudu horiseik hotu-hotu ba foti formulariu idade 24 ba leten labele.
“Primeiru ita tenke haree katak, kuaze maioria ita nia joven sira ho idade 18 too 23 maioria barak mak sei iha hela banku eskola, agora sira neebe durante ne’e ba trata sira nia dokumentu ho idade 24 too 27 nee sira nia dokumentu neebe sira ba trata nee saugati deit,” nia deklara.
Tanba nee mak nuudar reprezenta povu rekomenda ba Vise Ministru Asuntu Parlamentar atu hatoo tok ba Ministeriu Interiór hodi buka maneira oinsa mak bele halo klarifikasaun ruma ba joven sira, atu nunee joven sira bele hela ho informasaun neebe mak klaru.
Nunee ba kestaun nee Vise Ministru Asuntu Parlamentares, Aderito Hugo nia parte sei rekomenda preokupasaun Ministeriu Interior no Komando PNTL oinsa bele fo solusaun ba preokupasaun deputadu sira nian.
“Preokupasaun deputadu sira nia kona-ba kriteria iha rekrutamentu ba vaga ba kadetes PNTL foun, asuntu ida nee importante tebes, se kazu idade limita husi 18 too 23 nee, entaun ita bele hatene katak iha situasaun balun neebe ita bele observa oinsa oportunidade ida nee juventude barak mak sei labele asesu ba oportunidade ida nee. Hau sei envia ba Ministeriu Interior no Komando Jeral PNTL atu haree pontu situasaun ida nee,” nia afirma.
(jen)
