DILI, STLTIMORLESTE.com – Relasiona ho desizaun husi Juiz Koletivu Tribunal Rekursu (TR), nebee deside inkonstitusional ba alterasaun lei Organizasaun Judisiari, Prezidente Tribunal Rekursu la fo komentariu.
“Hau labele komentariu tanba Juiz nia servisu, hau dehan hau labele komentariu buat neebe politiku nian, ita koalia inkonstitusionalidade nee politiku nian, laos arguidu no vitima nian,” dehan Prezidente Tribunal Rekursu, Afonso Carmona ba jornalista sira iha Ministeriu Finansas, Sesta (22/08/2025).
Antes nee Tribunal Rekursu (TR) iha loron Kinta (31/07/2025) hasai ona desizaun hodi deside inkonstitusional ba alterasaun lei Organizasaun Judisiariu, neebe antes nee hatama husi Bankada balu iha Parlamentu Nasional ba iha TR atu halo fiskalizasaun abstrata sobre alterasaun lei refere.
TR konsidera katak, alterasaun ba lei Organizasaun Judisiariu iha norma artigu 2 labele aplika, tanba konsidera Inkonstitusional. Nunee, Inkonstitusional signifika la tuir konstituisaun no ilegal.
Desizaun Tribunal Rekursu deklara, inkonstitusional no komprimentu obrigatoriu signifika katak, husi Prezidente Republika, Governu no mos Parlamentu Nasional, inklui Tribunal no Juiz sira tenke hakruk hotu ba desizaun neebe sai.
TR deklara inkonstitusional ba norma iha artigu 2 lei numeru 4/2025, 28 fulan Abril, segunda alterasaun lei numeru 25/2021 loron 2 fulan Dezembru, husi lei Organizasaun Judisiariu iha artigu 76. Ho pedidu deklarasaun no forsa obrigatoriu no inkonstituisionalidade iha numeru 2 no mos numeru 3 neebe dehan iha artigu 76.
Juiz husi Plenariu TR neebe deside mak hanesan Juiz Duarte Tilman Soares, Jacinta Corea da Costa, Antonio Helder do Carmo.
Desizaun nee sai momentu neeba notifika kedan Prezidente Republika, Prezidente Parlamentu Nasional, no mos Prokurador Jeral Republika.
(ter)
