DILI, STLTIMORLESTE.com – Relasiona ho Tribunal hasai desizaun hodi la estradita sidadaun Filipina Arnolfo Teves fila hikas ba nia rain, Provedor Direitus Humanus no Justisa (PDHJ) konsidera desizaun Tribunal aas liu.
“Lei limita kompetensia Provedor nian atu kestiona ka halo analiza ba desizaun Tribunal nian, desizaun Tribunal iha neebe deit aas liu hotu, ba sira neebe sente desizaun la justu buka halo rekursu,” dehan Provedor, Virgilio da Silva Guterres ba jornalista sira iha Cruz Vermelha, Tersa (25/03/2025).
Nia hatutan, haree katak baze neebe sai referensia ba Tribunal hola desizaun mak artigu 35, neebe hatete katak ita so bele estradita sidadaun ida ba nia rain, bainhira husi nia rain no Estadu garante katak, nia fila ba nia hetan prosesu justisa neebe justu nia sei la hetan pena perpetua no pena de morte, se ita nia Tribunal too iha neeba, nia hanoin Tribunal la hetan garantia ida husi Estadu Filipina nian.
Sublina, Provedor rasik halo konfirmasaun ho parseiru Komisaun Diretus Humanus no Provedor Filipina sira dehan, Filipina revoga tiha ona pena de morte, maibe desizaun Tribunal no evidensia Tribunal nian dala ruma la hatudu garantia ida nee.
Akresenta tan, uluk sira hetan karta husi Teves ba Provedor nia esforus mak atu garante deit nia iha detensaun, direitu atu hetan komunikasaun, direitu atu hetan asistensia husi Advogadu, maibe kona-ba nia estatutu atu fila ka iha nee desizaun Tribunal nian, no too agora seidauk hetan karta ruma kona-ba desizaun nee.
Provedor afirma, respeita desizaun Tribunal nian, Estadu mos tenke garante nia estadia iha Timor labele fo ameasa ba ita nia seguransa, katak nia mos la halo krimi la ameasa sistema ita nia sistema justisa no sosial iha Timor, ida nee Estadu tenke haree.
Iha fatin ketak, Ministru Justisa, Sergio Hornai dehan, kona-ba Fujetivu iha prosesu rua mak halo administrativa no judisial.
“Hanesan Ministru Justisa responsável ba iha aktu administrativu ba iha kooperasaun internasional ba materia penal nian, ita fo ona ita nia hanoin ita la iha objesaun ruma ba iha estradisaun ba iha fujetivu sira, neebe laos deit ba Teves maibe ba fujetivu sira neebe komete krimi iha sira nia nasaun orijen, katak ita sei halo prosesu administrativa no judisial nian,” dehan MJ.
Nia hatutan, desizaun Tribunal nian sai ona, saida mak halo akompanhamentu mak ita nia konstituisaun dehan separasaun poder iha artigu 79 fo dalan respeita ba iha separasaun poder, katak idak-idak halao nia funsaun ita tenke hametin ita nian desizaun iha ita nia nasaun.
No konstituisaun RDTL artigu 35 hateten kona-ba estradisaun no halo espulsaun nian, tenke iha desizaun propriu no ohin desizaun Tribunal nian sai tiha ona, no respeita ba desizaun nee.
Nia hatutan, halo nafatin kontaktu liu husi Ministeriu Negosiu Estranjeitu ba Embaixada Timor nian neebe destaka iha Filipina, atu hatoo esklaresimentu kona-ba pozisaun Timor Leste ba iha Fujetivu nian.
Hatan kona-ba desizaun sai ona, bele ka lae trata dokumentus hela iha Timor, MJ dehan haree lai iha regra ka normas legal sira neebe Tribunal hasai tiha ona nuudar regra ida no desizaun ida nuudar orgaun soberania tenke respeitu. No Prokurador sei ezerse nia funsaun, hatoo ba iha Governu relasiona ho desizaun neebe sai ona husi Tribunal, Governu sei halo pronunsiamemtu kona-ba pozisaun Governu nian hateten katak, tenke rekonhese ita iha orgaun soberania haat, ita hanesan nasaun tenke respeita ba desizaun hotu.
No iha sirkunstansia balu neebe ita tenke konsidera, ita hanesan nasaun neebe Estadu parte la kleur tama ba adezaun, maibe kazu sira hanesan nee husu atu Estadu idak-idak atu respeita ba nia soberania kuandu iha desizaun ruma.
(ter)
