DILI, STLTIMORLESTE.com – Prosesu Arnolfo Teves Jr sidadaun Filipina nian neebe lao hela iha Supremu Tribunal Justisa, Juiz Koletivu foti ona desizaun no desidi atu halo estradisaun ba sidadaun refere hodi haruka fila ba iha nia rain orijen Filipina.
Tuir Prezidente Tribunal Rekursu, Deolindo dos Santos katak, nia parte mos hanesan Juiz iha neeba no tama iha prosesu nee, tanba nee labele esplika ba media, tanba lei mak bandu, maibe desizaun sai tiha ona.
“Desizaun koletivu sai ona iha Segunda feira liu ba nee, iha posibilidade parte sira neebe la konkorda ho desizaun nee atu rekore, depois rekore hotu mak plenariu Tribunal Rekursu sei haree fali desizaun nee,” dehan Deolindo ba jornalista sira iha Kaikoli, Sesta (06/12/2024).
Nia hatutan, desizaun nee desidi atu haruka fila, maibe parte sira iha direitu atu rekursu tuir buat neebe lei hateten. No prazu ba rekursu nee loron 30, kuandu parte ida halo rekursu, parte ida seluk mos iha direitu atu fo resposta ho prazu neebe hanesan.
Hatan kona-ba koletivu ida la konkorda atu estradita, PTR dehan regra prosesu penal permite ida nee, no labele esplika, tanba tama mos ba iha konteudu desizaun balu, no labele esplika tanba lei la permite, maibe bele asesu hodi haree.
Iha fatin ketak, Ministru Justisa Sergio Hornai dehan, husi parte Governu nian antes nee foti ona desizaun atu estradita sidadaun refere.
Desizaun antes nee foti ona, maibe tuir Konstituisaun, desizaun ida mak aas liu Tribunal, tanba nee hein desizaun Tribunal nian,” dehan nia.
(ter)
