DILI, STLTIMORLESTE.com – Prokurador Jeral Republika (PJR), Alfonso Lopez hatete, desizaun ba prosesu husi Tribunal Primera Instansia ka Tribunal Rekursu kuandu sai, parte sira sei estuda depois mak foin toma pozisaun hakarak rekursu ka lae.
“Kuandu desizaun Tribunal tantu Tribunal Primera Instansia no Tribunal Rekursu, parte rua husi Advogadu no Ministeriu Publiku sempre haree estuda lai, depois mak toma pozisaun posibilidade atu halo rekursu ka lae,” dehan PJR, Alfonso ba jornalista sira iha Timor Plaza, Dili, Kinta (12/12/2024).
Nia hatutan, parte hotu tenke respeitu prinsipiu kontraditoriu.
Iha fatin ketak, Jurista Jose Maria Guterres dehan, lei fo dalan atu desizaun neebe Tribunal sai, parte sira la aseita bele halo rekursu.
“Desizaun neebe sai kuandu parte rua nee ida la aseita bele halo rekursu, hodi hatoo nia fundamentu foun, depois mak Tribunal desidi fali kona-ba rekursu nee,” dehan nia.
Nia hatutan, husi rekursu neebe hatoo Tribunal sei hasai fali desizaun foun. Ezemplu iha prosesu balu bele halo fali re julgamentu, balu Tribunal bele aplika pena tetu mos ho rekursu neebe parte sira hatama.
(ter)
