DILI, STLTIMORLESTE.com – Rezultadu husi Sentru Formasaun Juridiku no Judisiariu (SFJJ) ba formadus Advogadu Privadu nain 7 la pasa ba iha faze estajiu, maibe ikus mai sira halo rekursu ba iha Vise Ministru Justisa no hasai desizaun ida atu fo tan oportunidade ba formadus sira tuir estajiu, tanba nee Koordenadora Ekipa reforma justisa kestiona ho desizaun Vise Ministru.
“Hau hakfodak ho desizaun neebe Vise Ministru halo, hau la hatene se Vise Ministru iha kompetensia atu deside rekursu sira nee, hau duvida katak iha kompetensia atu deside kona-ba ita nia formadus sira husi sentru halo,” dehan Koordenadora Grupu Trabalhu Reforma Setor Justisa, Lucia Lobato ba jornalista sira iha Kaikoli, Tersa (26/08/2025).
Nia hatutan, simu Advogadu sira nee ba hasoru malu ho Koordenadora inklui Advogadu sira seluk la kontente ho formasaun neebe lao iha aspetu balu, kona-ba se profesor sira iha SFJJ dehan sira la pasa no la hetan nota diak, no Vise Ministru ho nia despaisu rekursu ida neebe la hatene nia iha poder hodi deside duni ka lae, tanba nia Vise tenke simu delegasaun husi Ministru, katak sira nain hitu tenke tama fila fali ba estajiu, diak liu ita lalika halo SFJJ.
“Hau lee despaisu Vise Ministru nian maibe la iha razaun atu hatan sira nain hitu fila fali ba formasaun hodi kontinua ba estajiu, diak liu taka tiha deit SFJJ, se Governu ida nee dehan atu hasae kualidade autor judisiariu sira, papel Advogadu importante tebes atu asegura direitu sidadaun sira nian perante iha Tribunal,” tenik nia.
Nia firma, se formador rasik hateten dehan nia la serve sai Advogadu no poder politiku ida mai haruka sira bele tama, husu took Vise Ministru mak hanorin sira loron-loron ka formador sira mak hanorin, sente preokupante.
Lucia dehan, mensajen mos ba Vise Ministru atu koalia ho Vise maibe la iha resposta, tanba nee sei hakerek karta ida informa ba iha PM hodi informa kona-ba situasaun neebe agora SFJJ hasoru daudaun.
“Vise Ministru nia amigu boot, maibe servisu sira hanesan nee ita tenke halo didiak atu labele kontinua hetan Advogadu autor judisiariu neebe kbiit la too atu ezerse sira nia funsaun,” nia dehan.
Aleinde nee sira nain hitu ba halao ona estajiu, maibe sira tenke tuir fali avaliasaun ikus nian, no hein katak ida nee mos bele interven tan, taka tiha deit SFJJ, se mak hakarak sai Advogadu bele ba deit, lalika liu ona husi SFJJ.
Nia sublina, koalia duni ho formador sira kona-ba formadus sira neebe la liu, maibe sira hatoo razaun lubuk ida, no ita seidauk iha ordem dos advogados, sentru formasaun mak halo konta ba Advogadu sira, kuandu Ordem Advogadu sai ona sira mak halo duni formasaun fo akreditasaun ba Advogadu Privadu sira atu ezerse funsaun.
Maibe seidauk iha, SFJJ mak sei halo, maibe SFJJ halo formador sira avalia fo tiha valor ikus mai la liu halo rekursu, no despaisu Vise nian sira bele kontinua ba estajiu, ida nee preokupa.
Iha fatin ketak, Diretora Sentru Formasaun Juridiku no Judisiariu, Marcelina Tilman da Silva katak, formadus Advogadu Privadu sira neebe termina ona formasaun iha faze teoria, tama ona ba iha faze estajiu.
“Advogadu privadu hamutuk 29, sira mos termina ona sira nia formasaun teoria iha loron 31 fulan Maiu, agora sira halao hela estajiu iha eskritoriu Advogadu sira nian iha Timor laran, no mos Defensor Publiku iha Ermera, Baukau, Oekusi no Maliana,” dehan nia.
Nia akresenta, sira sei halao estajiu durante fulan 9, depois fila fali mai iha Sentru Formasaun hodi halo ezame ba iha agregasaun final. No liu husi ezame nee mak foin haree, formadu nee aptu atu sai Advogadu ka lae.
“Rezultadu sai husi Sentru Formasaun ba iha faze teoria nian iha nain 22 mak liu no iha nain 7 la liu, maibe nain 6 halo fali rekursu ba iha Vise Ministru Justisa no ikus mai Vise Ministru fo tan oportunidade ba sira atu tama iha faze estajiu, depois iha rezultadu ikus mak avalia fali,” dehan nia.
Durante estajiu Sentru Formasaun kontinua akompanha sira hanesan halo kontaktu beibeik ba sira nia orientador, no iha Eskritoriu Advogadu iha orientador ida mak sei orienta sira durante iha faze estajiu, no difikuldade ruma sira hasoru iha faze estajiu sira ba iha Sentru Formasaun hodi halo konfirmasaun ho formador sira.
(ter)
