DILI, STLTIMORLESTE.com – Tribunal Judisial Primeira Instansia Dili halao julgamentu ba arguida ho inisial GRFR, tanba komete krime hasoru lezada ho inisial ZBV.
Iha sala julgamentu laran Kinta nee (17/10/2024), antes atu hahu julgamentu Juiz prosesu haree katak, krime nia natureza semi publiku, lei fo dalan atu bele dada fila, kuandu lezada neebe hanesan vitima aseita.
Iha tentativa nee, lezada aseita atu dada fila krime refere, maibe husu arguida atu taka lezada nia kanek ho osan valor US$120.
Iha sala julgamentu laran arguida mos aseita atu fo osan refere, no arguida mos hamriik husu deskulpa ba lezada.
Rona tiha ida nee, Prokurador no defeza husu Tribunal atu omologa prosesu nee, ikus mai Tribunal omologa no absolve arguidu husi prosesu refere.
Tuir akuzasaun neebe iha katak, iha loron 7 Junhu 2023, haleu oras tuku 18h30 kalan, lezada ZBV hetan baku husi arguida ho tebe dala ida atinji iha kanuruk, tuku dala ida iha matan fukun parte los, tuku dala barak iha rentos no ulun fatuk too lezada monu tun ba rai.
Faktus nee akontese iha Kampung Baru, Suku Komoro, Don Aleixo, Munisipiu Dili. Motivu husi arguida baku lezada, tanba deskonfia lezada iha relasaun amante ho arguida nia laen.
Konsekuensia husi arguida nia hahalok nee halo lezada hetan moras iha isin lolon, lezada hetan tratamentu iha Sentro Saude Komoro, maibe simu deit aimoruk.
Arguida halo hahalok nee ho livre deliberada, hatene katak basa makaas no tuku hasoru ema nia isin bele hakanek ema seluk nia isin hanesan meius neebe viola lei.
Arguida hatene katak sira nia hahalok sira deskreve iha faktu ida nee nuudar hahalok krime neebe lei bandu, maibe kontinua halo.
Nunee konstitui arguida hanesan autoria material ho forma konsumada ba krime Ofensas Korporais tuir artigu 145 Kodigu Penal.
Audensia julgamentu prezidente husi Juiz Singular Jose Gonsalves, Ministeriu Publiku reprezenta husi Prokurador Domingos Bareto, arguidu hetan asistensia legal husi Defendor Publiku, Juvinal Dias.
(ter)
