BAUKAU, STLTIMORLESTE.com – Negosiante sira iha merkadu Tuanau deskonfia Autoridade Munisipiu Baukau liu husi ekipa konjunta muda negosiante sira husi merkadu tuan ba merkadu foun haree husi kor, tanba negosiante balun kontinua faan iha merkadu tuan sira.
Tuir informasaun neebe antes nee STL rekolha, negosiante sira halo negosiu iha merkadu tuan Vila Antiga, Beskem no Vila Nova, neebe Autoridade Munisipiu Baukau liu husi ekipa konjunta muda ba merkadu foun Tuanau hamutuk 879.
Husi numeru nee kompostu tipu negosiu obralan 148, roupa loja 125, faan sapatu 87, sembako 146, sasan dapur 54, kolisaun 10, alfayate 14, faan sana rai 3, Tais Timor 7, faan telefone 15, baber shop 5, sasan eletroniku 9, kosmetik 13, faan osan mean 1, faan pulsa EDTL 2, faan aimoruk ba agrikultura nian 1, darmasia 1, faan naan karun no seluk tan 10, faan ikan 23, produtu lokal 200 no iha mini restorante 7.
Muda negosiante ba merkadu Tuanau, hahu iha loron 19 Novembru 2024 neebe ekipa konjunta husi Autoridade Munisipiu Baukau muda uluk husi merkadu Vila Nova besik estadium Tadeu Laikana Baukau hafoin muda negosiante Vila Antiga no Beskem too remata, maibe negosiante hamutuk 879 balun la konsege faan iha merkadu Tuanau, tanba balun kontinua faan iha eis merkadu Vila Antiga no Beskem.
“Asaun nee ami konsidera hanesan familiarizmu, dala ruma sira familia haree ba kor nee mak la duni, maibe ami sira iha merkadu Tuanau tuun ba sira duni,” hateten negosiante Cedelizio ba jornalista STL iha merkadu Tuanau, Segunda nee (07/04/2025)
Nia katak, durante koloka negosiante iha merkadu Tuanau la hetan rendimentu, tanba negosiante balun kontinua faan iha merkadu tuan Beskem no Vila Antiga, nunee kompradores la ba merkadu Tuanau hodi kompras sasan nesesidade no produtu lokal no seluk tan neebe negosiante sira faan.
Tanba nee, negosiante husi merkadu Tuanau tenta halo negosiu hamutuk ho negosiante sira seluk iha merkadu tuan Beskem, maibe ekipa konjunta husi Autoridade Munisipiu Baukau la autoriza sein razaun, nunee asaun nee konsidera muda negosiante husi merkadu tuan ba Tuanau, ekipa konjunta haree husi kor no familia.
“Ida nee ami ezije, tanba buat honestidade nee la haree ba kor, la haree ba familia, ida nee mak ami dehan lideransa, mais haree ba kor no familia nee la onestidade, laos lideransa,” Cedelizio argumentu.
Nia katak, politika Autoridade Munisipiu Baukau atu ordena merkadu munisipal iha Munisipiu Baukau seidauk bele organiza, tanba husi negosiante balun halo negosiu iha espasu publiku hodi hetan rendimentu no sulan negosiante balun iha merkadu Tuanau halerik ba rendimentu, maibe la fo solusaun.
Tuir Cedelizio haree, negosiante neebe faan iha merkadu tuan Beskem, faan roupa, modo no seluk tan, nunee husu Autoridade Munisipiu Baukau liu husi ekipa konjunta atu muda negosiante sira ba merkadu Tuanau tenke onestidade, la haree ba kor no familia, maibe trata negosiante hanesan, tanba negosiante hotu nuudar Timoroan.
Negosiante faan modo iha merkadu tuan Beskem, Agostinha Sarmento hateten, hafoin ekipa konjunta muda negosiante, nia parte mos muda no konsege faan ona iha merkadu Tuanau, maibe la hetan rendimentu, tanba laiha kompradores, nunee deside fila hodi faan iha merkadu tuan Beskem.
“Wali kota sira la mai duni, uluk nee mak sira mai, maibe agora la mai ona nee mak hau faan fali iha nee,” hateten Agostinha.
Nia argumenta, kona-ba ekipa konjunta husi Autoridade Munisipal duni no bandu negosiante seluk atu faan iha fatin merkadu tuan Beskem, nia parte la hatene, tanba la haree asaun duni negosiante seluk husik negosiante balun halo negosiu.
Liga asuntu nee, STL tenta konfirma Diretor Servisu Jestaun Merkadu Munisipiu Baukau, maibe seidauk fo komentariu, tanba laiha knaar fatin.
(tom)
