DILI, STLTIMORLESTE.com – Diretor Jeral Servisu Rejistu Notariadu (DJSRN), Agustinho Gonsalves Viera husu ba publiku atu hatudu provas, bainhira deskonfia mosu broker iha DJSRN liu husi trata dokumentu sira.
“Hatudu provas dehan ema nee mak husu hau nia osan, lori mai hodi hatudu, se ita koalia deit ita bele fiar oinsa,” dehan Agustinho ba jornalista sira iha Mandarin, Dili, Kinta (11/09/2025).
Diretor nee mos desmente informasaun kona-ba broker sira nee laloos hotu, tanba sidadaun sira neebe mai tarata dokumentu ejizensia urjente sira mesak mak halo buat sira nee iha liur neeba, ”Se mak hatene kona-ba broker nee, lori broker ba hatudu hodi hatene broker mak ida nee, se rona deit husi ema ida nee hoax no lia anin atu halo saida,” dehan nia.
Hanesan Diretor Jeral Servisu Rejistu Notariadu (DJSRN), Agustinho kestiona se hatene ema neebe halao knaar hanesan broker, kaer ho liman lori ba hatudu dehan nia mak husu osan hanesan nee hodi trata dokumentu, hodi nunee bele fiar.
Nunee nia husu ba iha publiku neebe ba trata dokumentu direita ba iha Diresaun Jeral Servisu Rejistu Notariadu halo konsultasaun ho funsionariu sira iha neeba, labele foti osan fo ba iha ema liur hodi halo kontratu iha neeba no ikus mai kestiona dehan iha broker.
“Kuandu iha difikuldade ruma ba hasoru malu ho funsionariu Notariadu nian, atu rezolve problema sira nee,” dehan nia.
Iha fatin hanesan, Komunidade Tomas Soares dehan, evita labele iha broker, atu ema hotu tarata dokumentu tuir dalan neebe iha.
“Presiza evita atu labele iha broker, hodi nunee trata ema hotu hanesan tuir regra neebe iha, se mak rejista uluk se mak rejista ikus, laos uza broker hodi taka dalan ba ema sira neebe mai hein kleur,” dehan nia.
Jornalista: Jeniche da Costa
Editora: Carme Ximenes
