DILI, STLTIMORLESTE.com – Relasiona ho informasaun balu neebe espalha deskonfia broker mosu iha atendimentu balu, Ministru Justisa (MJ) deklara katak lei la fo fatin.
“Ita la admite saida deit neebe kontribui ba iha iregularidade no mos ba iha ilisitude, katak hahalok sira neebe tuir normas lei la fo fatin halo kobransa iha Instituisaun Estadu, nee signifika la admite instituisaun hanesan Ministru Justisa atu admite ema ruma halo aktu sira neebe kontra ita nia norma administrativu nian,” dehan Ministru Justisa, Sergio Hornai ba jornalista sira iha Mandarin, Tersa (25/03/2025).
Nia hatutan, normas administrativu nian hateten, funsionariu hotu kaer deit ba nia dever no obrigasaun atu halao servisu, tanba hetan renumerasaun neebe mai husi Estadu. Iha obrigasaun kumpri nia dever jeral hanesan funsionariu no mos dever espesifiku neebe define ona iha funsaun publiku nian.
MJ sublina, bainhira nia tama hanesan funsionariu promete atu halao servisu tuir regra nebee iha, labele lori ka introduz ka lori buat ruma kontrariu ho lei tama ba iha Instituisaun Estadu.
Nunee, instrusaun no averiguasuan halao nafatin, husu rekomendasaun mai husi inspetor auditoria nian atu halo kontrola ba iha servisu inspesaun no auditoria nian.
Iha fatin ketak, Diretor Jeral Servisu Rejistu Notariadu, Agustinho Gonsalves Viera katak, se ema ruma haree kona-ba broker, labele koalia deit ho ibun maibe lori provas ba hatudu.
“Se provas iha lori ba iha neeba, no hatudu ema ida neebe sai broker mak nee. Se mak dehan broker iha tenke hatudu faktus, labele koalia deit ho ibun, tanba nee la tolera kuandu funsionariu sai broker,” dehan nia.
Nia hatutan, zero toleransia la tolera la fo fatin ba funsionariu iha laran nee sai broker, se mak hatene hatudu faktus, se koalia la lori provas nee bosok.
Esplika tan, durante nee rona deit ema dehan broker, maibe seidauk haree ho matan broker nee mak se, tanba nee seidauk haree ho matan labele dun ema ida dehan broker. Tanba nee husu atu se deit mak haree ema balu pratika aktu broker, labele nonok hatudu provas.
Aleinde nee, Akademiku Universidade Nasional Timor Lorosae (UNTL), Rafael de Jesus dehan, funsionariu sira tenke halao servisu tuir regra neebe iha, hodi atende ema hotu hanesan.
“Funsionariu sira tenke halao servisu ho diak hodi atende ema hotu hanesan, tanba ema barak mak presiza duni trata dokumentus hodi viajen no buka servisu,” dehan nia.
Reforsa, ema neebe halo hahalok broker labele tolera, aktu neebe la diak nee tenke prosesa.
(ter)
