BAUKAU, STLTIMORLESTE.com – Asidente iha Wailakama, Postu Administrativu Vemasi, Munisipiu Baukau, neebe envolve husi bus 2 deskonfia bus marka jocfen konduz husi ajudante, soke bus Maudode rezulta pasajeiru balu kanek grave no nain 1 mate.
Kondutor bus Maudode José de Sousa esplika, diresaun bus Maudode tula pasajeiru besik nain 10 husi Dili atu ba Postu Administrativu Venilale, Munisipiu Baukau, maibe too iha estrada publiku area Wailakama hetan asidente, tanba soke husi bus Jocfen diresaun husi Munisipiu Lautem ba Dili.
“Ami nia diresaun husi Dili mai iha Wailakama, ami haree bus nee tun mai taka dalan, ami para metin nia mai ros iha ami nia oin mak baku fila. Bus nee Lospalos nian konjak mak lori, laos kondutor mak lori,” José informa ba jornalista sira, iha resintu sala emerjensia HoREX, Baukau, Kinta (18/12/2025).
Nia sublina, bus Jocfen konduz husi ajudante no too iha area kruzamentu Wailakama halai ho velosidade nunee kondutor bus Maudode deside para fatin, maibe pasajeiru balu no kondutor husi bus Maudode hetan kanek no tohar, tanba pankada husi bus Jocfen.
Nia preokupa ho asidente nee, tanba bus Jofer tula pasajeiru barak, maibe konduz husi ajudante.
“Hau dehan konjak mak lori tanba loron-loron ami haree kondutor baibain lori nee nia la lori, prosesu kazu nee tenke ba oin,” nia fundamente.
Kondutor nee husu Komando Polisia Munisipiu Baukau atu prosesu asidente refere, tanba pesoal neebe konduz bus Jocfen laos kondutor neebe aprova husi Diresaun Nasional Transporte Terrestre, maibe nuudar ajudante ba bus Jocfen.
Asidente nee akontese iha loron 18 Dezembru nee parte meudia, envolve husi bus Jocfen xapa matrikula 39.343 TL no bus Maudode xapa matrikula 38.050.
Hafoin asidente nee akontese parte ambulansia Munisipiu Baukau too kedas fatin, hodi evakua vitima sira ba sala emerjensia Hospital Rejional Eduardo Ximenes (HoREX) Baukau no Polisia Tranzitu Munisipiu Baukau mos too kedas fatin.
Tuir observasaun jornalista STL nian iha sala emerjensia HoREX Baukau nota katak, pasajeiru sira husi bus 2 refere neebe sai vitima ba asidente refere daudaun hetan ona tratamentu husi mediku sira no pasajeiru ida lakon vida.
Pasajeiru neebe lakon vida nia mate isin asegura ona iha sala mortuariu HoREX Baukau, hein familia hodi transporta ba nia rezidensia iha Munisipiu Lautem.
Jornalista: Tomas Reis
Editora: Carme Ximenes
