BAUKAU, STLTIMORLESTE.com – Ema deskonhesidu tenta futu labarik minoridade iha area Laribere, Suku Defauasi, Postu Administrativu Baguia, Munisipiu Baukau.
Xefe Suku Defauasi, Agostiano Ximenes Guterres esplika, kazu ema deskonhesidu futu labarik feto idade 12 akontese iha loron 30 Marsu 2025, pur volta tuku 18:00 loraik, bainhira vitima halimar hela iha nia uma kotuk mota laran, mosu ema deskonhesidu nain tolu kuaze falun oin hotu, tenta futu vitima ho tali liu minutu balu hafoin husik fila fali vitima no ema deskonhesidu sira halai.
“Informasaun, ema nee uza hela sapeu ninja, la konhese nia oin, sira futu hela tiha labarik nee, maibe husik fali labarik nee, sira mos ba, labarik nee mos halai fila fali ba nia uma. Konforme informasaun neebe espalha, ema organizadu agora lemo lemo iha fatin sira nee, ema dehan relasiona ho estrada ponte buat sira nee, dehan tenke uza ema,” hateten Agostiano ba STL liu husi telefone, Tersa (01/04/2025).
Nia deskonfia, asaun ema deskonhesidu neebe futu labarik feto minoridade nee atu naok no atende ba konstrusaun ponte sira, maibe forsa natureza parte kultura husi vitima la aseita, nunee vitima ema deskonhesidu sira konsege kore hikas fali tali neebe kesi iha vitima nia liman hodi vitima ba hikas nia hela falin.
Nia sublina, hafoin vitima too uma konta asaun refere ba parte familia, tenta buka tuir kedas, maibe la konsege hetan ema deskonhesidu sira, tanba lao dook ona.
Nunee hatoo kedas informasaun ba parte Ofisial Polisiamentu Suku (OPS) no kontinua kedas ba Postu Eskuadra Postu Baguia hodi prosesu kazu refere, tanba asaun neebe ema deskonhesidu sira halo komete krime neebe previstu ona iha lei sira.
“Ami rekomenda grupu hanesan nee tenke buaka tuir duni. Ami mos fo ona informasaun ba inan aman sira kuidadu labarik minoridade sira ba eskola no lao ba dook tenke kuidadu, tanba situasaun sira hanesan nee bele fo ameasa ba ita nia komunidade, liu-liu labarik minoridade,” Agostiano rekomenda.
Xefe Suku nee husu Polisia Nasional Timor Leste liu husi Komando Polisia Munisipiu Baukau atu buka tuir grupu deskonhesidu refere hodi submete ba prosesu investigasaun, tanba asaun falun oin hodi futu, nee fo ameasa ba komunidade sira nia movimentu, liu-liu la fo liberdade ba labarik kiik sira atu halimar mesak iha area dook uma nian, tanba tauk.
Liga ho asuntu nee, jornalista STL tenta konfirma Komadante Komando Polisia Munisipiu Baukau, maibe seidauk bele fo komentariu, tanba seidauk simu relatoriu.
(tom)
