DILI, STLTIMORLESTE.com – Bankada Partidu Libertasaun Popular (PLP) iha Parlamentu Nasional (PN) deskonfia ema estranjeiru ida okupa kargu Diretor Finansas iha Millenium Challenge Account Timor Leste, Institutu Publiku (MCA.IP), maibe lei la autoriza ema estranjeiru sira atu asesu sistema free balance neebe Timor Leste iha.
Kestaun nee Deputada Bankada PLP, Maria Angelina Sarmento deklara wainhira governu ho Parlamentu Nasional diskuti hela orsamentu ba Millenium Challenge Account Timor Leste, Institutu Publiku, iha Parlamentu Nasional, Kuarta (20/11/2024).
“Ita hatene katak ema estranjeiru nee labele asesu ba ita nia sistema free balance, maibe MCA hanesan Institutu Publiku maibe Diretor Finansas nee ema estranjeiru ida, oinsa mak nia bele jere no atualiza informasaun sira iha Finansas, enkuantu nia rasik labele asesu, tanba lei la autoriza ema estranjeiru atu asesu ita nia sistema free balance,” hatete Deputada Maria Angelina.
Maibe nia dehan, tuir regras neebe iha katak ema estranjeiru labele asesu ba free balance, signifika finansas nee ema Timoroan mak tenki kaer labele fo ema estranjeiru, ho nunee nia husu ba Ministra Finansas atu fo esklaresimentu.
“Hau husu ba atu halo esklaresimentu ida kona-ba ema estranjeiru ida okupa kargu Diretor Finansas Millenium Challenge Account Timor Leste Institutu Publiku,” hatete Deputada nee.
Hatan ba ida nee, Ministra Finansas (MF), Santina Cardoso Viegas hatete, Orsamentu neebe governu aloka ba iha Millenium Challenge Account Timor LesteI Institutu Publiku iha kategoria Bens Servisu iha tinan 2024 ho montante US$ 150.000 deit no ba tinan 2025 aloka US$ 85.000 ba Bens Servisu.
Nia dehan, atividade Millenium Challenge Account Institutu Publiku laos finansia deit husi Governu Timor Leste, maibe finansia mos husi Millenium Challenge Coorporations, tanba nee sira iha direitu atu kompozisaun staf iha Millenium Challenge Account Timor Leste Institutu Publiku.
Entretantu iha biban nee Parlamentu Nasional aprova ona orsamentu ba orsamentu neebe aloka ba Millenium Challenge Account Timor Leste Institutu Publiku hamutuk US$ 5.085.000 iha faze espesialidade ho votu afavor 42, kontra 0 no abstensaun 15.
Tuir proposta OJE 2025, orsamentu neebe aloka ba Millenium Challenge Account Timor Leste Institutu Publiku hamutuk US$ 5.085.000 husi orsamentu nee aloka salariu vensimentu la iha Bens Serbisu US$ 85.000, transferensia publika US$ 5.000.00, kapital menor la iha, no kapital dezenvolvimentu la iha.
(alb)
