DILI, STLTIMORLESTE.com – Ekipa Konjunta dada police line iha edifisiu ETO (Andar 5-Red), tanba deskonfia Empreza Capital Vestures Timor (CVT) halao pratika jogu online iha neeba.
Iha atividade inspesaun nee, halao iha loron Kuarta Feira (10/12) loraik tuku 15:05 durante oras hirak nia laran, neebe lidera husi Komandante Operasaun Superiendente Asistente Polisia, Mouzinho Tavares Correia hamutuk ho ekipa DSIK no servisu Sekreta sira.
Police line nee autoridade seguransa dada, iha sala operasaun sistema no sala Diretora empreza CVT nian.
Durante operasaun ekipa konsege identifika ekipamentu ka asesores informatika sira hanesan komputador marka LG-16, komputador (geral)-52, komputador Samsung-3, laptop HP-1, laptop (geral)-17, set Starlink-2.
Aleinde nee ekipa konjunta lori trabalhador Timroan nain tolu no Diretora empreza nee, hodi halo identifikasaun liga ho atividade neebe sira halao.
Enkuantu, Autoridade PNTL sei kontinua investigasaun hodi klarifika, atividade sira no atu determina responsavel direta ba operasaun. PNTL mos sei kontÃnua rekolha dadus, dokumentasaun, hodi prepara akta krime tuir prosedimentu legal nian.
Molok nee, iha loron 03 Dezembru 2025 PNTL liu-husi Diresaun Servisu Investigasaun Kriminal (DSIK) ezekuta mandadu husi Ministeriu Publiku halo buska no aprensaun ba iha Grand Dragon Lotaria neebe lokaliza iha Prai dos Coqeirus, nomos Sukursal iha Timor Plaza, tanba deskonfia pratika atividade jogu Online ilegal.
Nunee, liu-husi PNTL ninia buska no aprensaun identifika kompanhia Grand Dragon nee pratika atividade jogu Online maka Primeiru Ministru, Kay Rala Xanana Gusmao uza nia kompotensain nuudar Xefe Governu deside taka tiha kompanhia Grand Dragon ne, tanba la obdese ba rezolusaun Governu nian neebe desidi taka no bandu pratika jogu online ilegal.
Jornalista: Alberto Menezes
Editora: Carme Ximene
