DILI, STLTIMORLESTE.com – Sidadaun neebe hela iha Indonezia deskonfia falsifika dokumentus hodi hetan osan pensaun veteranus nian, prosesu investigasaun kontinua lao hela.
“Prosesu neebe tama mai ita sei halo investigasaun, hau labele koalia ba faktus neebe iha, se mak halo buat ida nee no se mak apoia nia, sei buka tuir ida nee, se mak fo vantajen ba nia seguransa asegura nia hodi halo aktu ida nee, sei iha investigasaun nia laran,” dehan Prokurador Jeral Republika, Nelson de Carvalho ba jornalista sira iha Kolmera, Kinta (12/02/2026).
Nia hatutan, kona-ba prosesu investigasaun tomak ida nee kabe ba iha Prokurador titular mak hatene.
Hatan kona-ba prosesu dirijente Timor Gap nian, Prokurador deklara, nia parte labele fo komentariu.
“Faktus kursial labele koalia, maibe sei iha prosesu investigasaun, signifika katak
investigasaun lao hela,” dehan PJR.
Aleinde nee, kona-ba foin lalais Mari Alkatiri no Arsenio Bano ba presta deklarasaun iha MP, PJR deklara, sei iha faze investigasaun nia laran, Prokurador labele koalia kona-ba ida nee.
Iha fatin ketak, Akademiku UNTL, Rafael De Jesus dehan, Prokurador tenke tau atensaun ba problema sira hanesan nee.
“Aktu sira hanesan nee dada atensaun ema barak nian, tanba nee husu atu prokurdor sira tenki halo investigasaun klean, hodi hateten lo-loos kona-ba aktu nee,” dehan nia.
Nia argumenta, aktu sira hanesan nee tenke levanta ba oin atu halo prevensaun, nunee ema seluk hanoin fali atu halo aktu nee, sira tauk ona.
Rekorda katak, antes nee deskonfia inan feto ida hela iha rai liur, maibe tenta atu simu pensaun no ikus mai konsege deteta, polisia detein kedan hodi halo prosesu investigasaun.
(ter)
