DILI, STLTIMORLESTE.com – Tribunal Judisial Primeira Instansia Dili (TJPID) liu husi despaixu ikus ba prosesu primeiru interogatoriu, deside aplika medida Koasaun Aprezentaun Periodika (AP) ba kazu deskonfia feen sona laen, iha area Beto.
Arguida HRA lori mai iha Tribunal no husi parte Ministeriu Publiku nian (MP) promove ho krime Arma Branka no Ofensas integridade fizika simples.
Tribunal halo tiha identifikasaun ba arguida ikus mai deside tama ba iha alegasaun.
Iha alegasaun husi parte Ministeriu Publiku nian husu Tribunal atu aplika medida koasaun Aprezentasaun Periodika ba arguida no parte defeza husu Tribunal atu aplika medida Termu Identidade Rezidensia (TIR).
Rona tiha alegasaun, ikus mai Juiz estajiadu deside aplika medida Koasaun Aprezentasaun Periodika ba arguida.
Hafoin despaxu, Defeza ba arguida, Defensor Públiku, José da Silva hateten, Tribunal hatun despaxu hodi aplika medida koasaun Aprezentasaun Periodika ba arguida, nunee hanesan defeza ba arguida konkorda despaxu Tribunal nia, tanba sei iha investigasaun nia laran.
“Iha despaisu Tribunal nia deside aplika medida koasaun Aprezentasaun Periodika kada semana ida dala ida, iha loron Segunda feira, iha Postu Polisia neebe mak hela besik ba,” dehan Jose ba jornalista sira iha Kaikoli, Sesta (20/02/2026).
Nia hatutan, hanesan defeza aseita ho medida neebe Tribunal aplika, atu asegura arguida ba iha prosesu investigasaun, tanba arguida konfesa katak nia laen amante ho feto seluk mak nia feen sona nia.
Prosesu nee prezide Juiz estajiariu, Cipriano de Fatima Sarmento, Ministeriu Publiku reprezenta husi Prokurador, Napoleão da Silva, arguida hetan asistensia legal hosi Defensor Públiku José da Silva.
(ter)
