DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba arguidu ho inisial JSM, neebe deskonfia komete krimi tolu.
Ba prosesu ida nee, antes nee Tribunal rona ona deklarasaun husi arguidu no lezada, maibe tanba iha mudansa ba Koletivu, no iha Juiz Adjuntu foun rua, ho nunee Juiz prosesu Afonso Carmona deside hodi lee hikas deklarasaun sira antes nee.
Iha sala julgamentu laran Juiz nee lee sai arguidu nia deklarasaun katak, momentu neeba ema tuda arguidu nia uma no arguidu hatene Gil mak tuda, tanba nee arguidu rekonhese ba Gil nia uma lori ho katan ida, maibe intensaun atu ba husu deit. Kona-ba osan lakon arguidu la iha konhesimentu.
No deklarasaun lezada nian katak, momentu neeba lezada nia laen sai hela ba hospital, no arguidu ba hakilar halo lezada tauk hodi halai sai husi uma, no la save odamatan uma nian. No dader lezada fila mai uma, haree osan neebe iha uma laran lakon ona.
Rona tiha lezada no arguidu nia deklarasaun, Tribunal adia ba loron seluk hodi rona alegasaun.
Tuir akuzasaun neebe iha katak, iha loron 06/03/2023 maiz ou menus tuku 22h00 OTL, arguidu JSM ho katana ba lezada nia uma hodi halo monu lezada nia vaju aifunan sira monu ba rai, nomos hakilar iha lezada nia uma katak “Gil, o mane nee sai deit, panleiru maka sulan deit iha uma laran”.
Arguidu hakilar liafuan refere ba lezada nia laen Gil, tamba arguidu deskonfia katak lezada nia laen Gil maka tuda arguidu nia uma iha tempu neeba.
Bainhira arguidu hakilar lezada nia laen nunee, lezada ho kondisaun isin rua todan no lezada nia laen Gil la hela iha uma, tamba Gil sei ba haree familia moras iha Hospital Nasional Guido Valadares, Dili.
Arguidu uza katana hodi taa rahun tiha lezada nia vidru ida no taa estraga lezada nia vaju aifunan 5.
Haree arguidu nia asaun refere, lezada trauma hodi lori sai nia oan nain tolu sei kiik sai husi odamatan kotuk hodi buka fatin seguru.
Haree lezada ho nia oan sira sai tiha husi uma, arguidu ho nia kolega sira tama fali ba lezada nia uma laran soe namkari lezada nia roupa no sapatu sira iha uma laran nomos, baku fila kulsaun sira.
Arguidu ho nia kolega sira mos loke lezada nia armari ho naok lezada nia osan iha armariu laran ho valor US$ 6.000.00 (dolar amerikanu trihun neen).
Konsekuensia direta no nesesariu husi arguidu ho nia kolega sira nia hahalok refere, rezulta, lezadu LPR ho nia oan sira sente tauk no trauma tamba arguidu uza katana taa estraga lezada nia vidru ida, aifunan ho vaju 5 rahun hafoin naok tan lezada nia osan ho valor US$ 6.000,00 (dolar amerikanu rihun neen), iha armariu laran.
Arguidu ho nia kolega sira halo sira nia hahalok refere ba lezada ho konsiente, libre deliberada, hatene katak, uza katana ameasa ema hanesan meus ida hodi halo tauk ema nomos uza katana hodi taa estraga lezada nia sasan sira, hanesan meu ida hodi halo tauk lezada ho nia familia sira nomos arguidu aproveita hodi naok lezada nia osan iha armariu laran.
Arguidu hatene katak, nia asaun refere nudar hahalok krime neebe lei bandu, maibe halo nafatin.
Tamba nee konstitui arguidu JSM nudar autor material ho forma konsumada ba krime konkursu, 1. Krime danu ho violensia, tuir artigu 260 KP. No Krime arma branka, tuir artigu 2/2 al. f) konjugadu ho artigu 20/1 husi lei n.5/2017. No Krime Furtu agravadu, tuir artigu 252 husi КР.
Audensia julgamentu nee, prezide husi Juiz Kolektivu, Afonso Carmona, Francisca Cabral, Jose Escurial, Ministeriu Publiku reprezenta husi Prokurador Antonio Tavares, arguidu hetan asistensia legal husi Defensor Publiku Fransisco Martins.
(ter)
