DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial SM, tanba deskonfia komete krimi Roubo no krimi Kondusaun sem karta.
Halo tiha identifikasaun ba arguidu, ikus mai Juiz Turnu Jose Maria deside aplika medida Aprezentasaun Periodika ba arguidu ho inisial SM.
Tuir defeza arguidu nian katak, aseita ho medida neebe Tribunal aplika, tanba haree mos ba arguidu nia kondisaun tanba iha oan no feen.
“Tribunal aplika medida Aprezentasaun Periodika ba arguidu atu aprezenta aan iha eskuadra polisia neebe hela besik ba kada semanal,” dehan nia ba jornalista sira iha Tribunal Dili, Sesta nee (02/05/2025).
Nia hatutan, iha alegasaun Prokurador husu Tribunal atu aplika medida Prizaun Preventiva, maibe parte defeza husu Tribunal atu aplika medida Aprezentasaun Periodika. No ikus mai Tribunal deside aplika medida Aprezentasaun Periodika ba arguidu.
Sublina, hanesan defeza konkorda ho despaisu nee, sei la halo tan rekursu.
Tuir kronolojia katak, iha loron 29 fulan Abril, arguidu nain rua foti telemovel, no arguidu ho inisial J tanba idade minoridade nunee Tribunal Liberta tiha, no julga mak arguidu ho inisial SM.
Sira nain rua nee ida inisial J mak foti telemovel, no inisial SM mak konduz motor.
Prosesu nee prezide husi Juiz turnu Jose Maria, Ministeriu Publiku reprezenta husi Prokurador Antonio Tavares, arguidu hetan asistensia legal husi Defensor Publiku Germano Guterres Ramos.
(ter)
