DILI, STLTIMORLESTE.com – Bankada FRETILIN liu husi Deputadu Florentino Ximenes akuza ka deskonfia ekipa reforma Justisa rekruta deit militante Partidu CNRT atu ba estuda iha Portugal, iha area direitu no medisina legal.
“Hau hakarak husu esklaresimentu ida husi Ministeriu Justisa kona-ba ita boot nia diresaun ida neebe atu halo rekrutamentu ba bolseiru sira nee, hau rona dehan halo diskriminasaun tebes tanba ho kriteria partidu politiku nian,” hatete Deputadu Florentino iha ambitu debate OJE 2025 iha faze espesialidade, iha PN, Kinta (14/11/2024).
Maski nunee nia dehan, ihaTimor Leste halo ona selesaun tuir kriteria partidu nian maibe hafoin bolseiru sira too tia Portugal mos Koordenadora ekipa reforma Justisa Lobato mos halo tan tes ida, ho nunee husu Ministeriu Justisa atu halo klarifikasaun ida.
“Hau hakarak husu pedidu esklaresimentu husi Ministru Justisa atu esplika, tanba iha Ministeriu Justisa nia okos,” dehan Deputadu nee.
Deputadu nee mos preokupa ho prosesu rekrutamentu neebe iha, tanba rekruta ema la haree ba meritu, maibe haree liu ba koor partidu.
Hatan ba ida nee, Primeiru Ministru (PM), Kay Rala Xanana Gusmão rezeita deklarasaun husi Deputadu Bankada Partidu FRETILIN, Florentino Ximenes neebe dun governu halo rekrutamentu ba militante Partidu CNRT atu ba estudu iha area direitu no medisina legal iha Portugal.
“Atan oan hau la simu liu
akuzasaun neebe ita boot dehan hili deit partidu, lae tanba sira neebe simu bolsa nee liu husi teste neebe makaas,” hatan Primeiru Ministru, Kay Rala Xanana Gusmão.
(alb)
