BAUKAU, STLTIMORLESTE.com – Deskonfia Guarda Munisipal neebe inklui iha ekipa konjunta husi Autoridade Munisipiu Baukau ba programa sobu merkadu, tenta baku negosiante sira nomos rasta “kolu” negosiante feto ida nia ropa too monu ba rai, iha eis merkadu area rotunda Vila Nova, Baukau.
Negosiante Marciana Justina Boavida rekonhese, negosiante sira neebe halo negosiu iha fatin merkadu Vila Nova no Vila Antiga, Autoridade Munisipal liu husi ekipa konjunta muda ona ba merkadu foun Tuanau, maibe halo negosiu iha merkadu foun refere la hetan rendimentu, tanba prezensa numeru vendedores menus.
Nunee deside ba faan fali iha fatin tuan hafoin hetan rendimentu natoon hodi sustenta nesesidade ekonomia familia, maibe iha loron 13 Janeiru 2025 ekipa konjunta husi Autoridade Munisipiu Baukau prezensa too fatin hodi baku negosiante sira no sasan modo sira neebe faan.
“Sira mai dehan halo sasan, haloot sasan, imi la haloot sasan ami mak estraga, entaun sira tuun husi karreta hiit modo sira nee taka fila hotu, soe namkari baku tan nia nain no kolu balu nia ropa,” haktuir Marciana ba jornalista sira iha rotunda Vila Nova, Tersa (14/01/2025).
Negosiante nee konta, asaun neebe Guarda Munisipal halo hetan apoiu seguransa husi membru Polisia Baukau, maibe asaun nee mosu parte seguransa la halo intervensaun no negosiante nain 4 feto hetan baku hodi nain 1 hetan kanek iha parte inus.
Maibe hafoin asaun nee akontese parte vitima sira aprezenta aan inklui evidensia hanesan ropa ba Provedoria Direitu Umanu Justisa (PDHJ) Delegasaun Territorial Baukau hodi prosesu ba oin.
Enkuantu vitima neebe roupa hetan kolu husi Guarda Munisipal Julmira Freitas sente triste ho asaun nee, tanba pesoal Guarda Munisipal balu laiha fuan halo asaun neebe la merese.
“Horiseik sira foti hau nia sasan mak hau hadau, entaun sira tuku hau no dada hau nia lipa, nunee lipa monu tiha, entaun hau lori ba PDHJ sira haruka hau hatais fali,” nia konta.
Negosiante nee rekonhese, faan iha eis merkadu area rotunda Vila Nova kontra regras Autoridade Munisipiu Baukau, maibe tanba nesesidade razaun faan iha merkadu foun la hetan rendimentu atu sustenta ekonomia familia liu-liu selu oan sira nia estudu.
Nunee mos vitima Jeronimo Parada konta, prezensa Guarda Munisipal neebe apoiu seguransa husi parte Polisia too iha fatin halo asaun hanesan estraga negosiante sira nia sasan, nunee nia parte fo hanoin, labele estraga sasan, maibe pesoal seguransa husi Batalhaun Ordem Publiku (BOP) neebe fo apoiu seguransa halo asaun ba vitima sira.
Hatan ba kestaun nee, Xefe Ekipa Konjunta atual Sekretariu Munisipal Planeamentu Investimentu no Dezenvolvimentu, Eduardo Filipe Ximenes hateten, hafoin Autoridade Munisipal liu husi ekipa konjunta muda negosiante sira husi merkadu Vila Nova no Vila Antiga ba merkadu Tuanau avizu ona atu labele faan tan iha fatin eis merkadu sira, tanba tempu besik atu halo reabilitasaun ba estrada urbana, maibe negosiante sira la koopera kontinua faan fali iha fatin tuan.
“Se se deit mak faan, klaru Autoridade Munisipal sei ba atua liu husi Jestaun Merkadu obrigatoriu hasai sira nia sasan uza forsa tomak, obriga ema hotu kumpri ba espasu publiku neebe ita bandu labele faan, hasai lipa nee informasaun falsu,” hatete Eduardo.
Xefe Ekipa nee konsidera, relasiona ho informasaun husi negosiante neebe dehan, Guarda Munisipal ba halo atuasaun inklui kolu negosiante nia roupa nee lalos, tanba ekipa kumpri deit regras hasai sasan, maibe kona-ba asaun nee, Autoridade Munisipal sei responsabiliza bainhira vitima sira hatoo ona keixa.
(EST 2)
