DILI, STLTIMORLESTE.com – Deskonfia joven sira Suku Vila Verde, iha Kinta, tuku 04:00 dader sona kanek membru Corpu Seguransa Pesoal (CSP), Ajente Prinsipal Joselino Arcanjo Tomas iha Vila Verde, tanba nee Polisia Nasional Timor Leste (PNTL) kaptura ona joven nain 9 neebe deskonvia involve iha asaun sona kanek vitima too tama Hospital Nasional Guido Valadares (HNGV).
Tuir informasaun neebe STL asesu iha terenu katak, iha Kinta madrugada (20/11/2025), mosu dezentendementu too hamosu konfiltu entre joven sira iha Vila Verde, neebe rejulta deskonfia joven balun sona kanek membru CSP Ajente Prinsipal Joselino Arcanjo Tomas iha parte kakorok no evakua kedas ba HNGV hodi halo tratamentu ba nia saude.
Komandante PNTL Munisipíu Dili, Superintendente Xefe Orlando Gomes esplika, kazu atake malu iha Suku Vila-Verde hodi sona kanek membru CSP nee konsege kaptura ona joven nain 7, hodi asegura iha Komandu PNTL Munisipíu Dili.
“Iha Kinta nee tuku 4:00 madrugada, mosu akontesementu ida iha Aldeia Lemo Rai, Suku Vila-Verde, grupu balun maka halo asaltu malu, konsege sona membru CSP ida kanek. Iha akontesementu nee tanba iha ita nia sidadaun halo festa nee ba familia deit, maibe ninia alin balun tan nia maun alin sira husi fatin seluk mai hamutuk depois konsumu tua entaun iha neeba hamosu konflitu,” hatete Komandante PNTL Munisipíu Dili, Superintendente Xefe Orlando Gomes ba jornalista sira iha Komandu PNTL Munisipíu Dili, Kinta (20/11/2025).
Nia deklara, konflitu nee mos parte seguransa husi Vera Kruz no forsa rejerva sira halo kedas atuasaun hodi netraliza situasaun iha lokal krime, neebe Polisia kaptura nain 7 lori ona mai iha Komando PNTL Munisipíu Dili, hodi halo identifikasaun.
“Ita nia membru Polisia sira nafatin buka tuir sira seluk neebe involve iha konfiltu nee, nunee hodi submete ba prosesu investigasaun,” nia tenik.
Nia afirma, suspeitu nain 7 sei halo detensaun durante oras 12, hodi halo prosesu ivenstigasaun molok submente ba Ministeriu Publiku hodi halo prosesu.
Nunee mos Mediku Espesialista iha HNGV lakohi temi naran informa, sidadaun ida ema deskonesidu sona kanek iha nia kakorok, pasiente mai Doutor sira halo atendementu lalais, no baixa hela hodi kontinua tratamentu tanba kanek iha kedas kakorok.
“Dadaun nee ita haruka baixa hela iha HNGV, ita haree kanek grave oitaun tanba sona iha kakorok,”nia afirma.
Jornalista: Jeniche da Costa
Editora: Domingas Gomes
