DILI, STLTIMORLESTE.com – Informasaun neebe antes nee espalha iha Media Sosial, Juiz ida fo karreta ba nia oan treinu, prosesu refere iha ona Konselhu Superior Majislatura no besik konklui ona.
“Prosesu lao hela besik konklui ona,” dehan Prezidente Tribunal Rekursu, Deolindo Dos Santos ba jornalista sira iha Delta Nova, Dili, Segunda (28/04/2025).
Nia hatutan, KSMJ neebe PTR lidera, primeiru kumpri Konstituisaun segundu kumpri Estatutu Juiz sira nian, tanba nee sidadaun ruma lori prosesu ba iha KSMJ hanesan orgaun neebe kontrola Juiz sira, KSMJ sei halo hanesan primeiru keixa neeba KSMJ delibera no loke prosesu averiguasaun.
PTR dehan, noemia Inspetor ruma mak halo prosesu averiguasaun ba keixa nee no rekolha informasaun hotu, depois inspetor nee halo relatoriu ba KSMJ katak, husi relatoriu averiguasaun konaba saida mak nia hetan.
Nunee husi nee mak KSMJ foin deside, se iha indisus sei ba iha prosesu disiplinar, se la iha nia prosesu taka. Maibe se nia prosesu sei hakat ba iha prosesu disiplinar, no kuandu tama ona iha nee Juiz sira nia obrigasaun hanesan mos arguidu.
No baibain kuandu iha indisus instruktor halo akuzasaun iha prazu legal nia laran, depois notifika akuzadu se nia Juiz iha mos direitu atu defende nia an tuir prazu legal loron 30 nia laran, apresia nia relatoriu final maka sei haruka ba iha KSMJ hodi haree atu deside kona-ba ida nee.
Iha fatin ketak, Akademiku UNTL, Rafael de Jesus dehan, Justisa neebe iha ba ema hotu, tanba nee halao servisu tuir lei neebe iha.
“Lei iha atu regula ema hotu, tanba nee utiliza sasan estadu tuir regra neebe iha, hodi hatudu katak ema hotu moris tuir regra neebe iha,” dehan nia.
(ter)
