BAUKAU, STLTIMORLESTE.com – Deskonfia kauza husi divorsiu, DMR idade 19 hanoin barak lao tama uma kalan, nunee aman hirus hodi basa no ikus hakotu vida liu husi tara aan.
Aman matebian atual Xefe Suku Badoho’o, Pedro do Rosario haktuir, iha loron 10 Marsu tinan nee, parte dader, matebian sai husi uma ba bazar iha merkadu Berkoli, hafoin remata bazar matebian hamutuk fali ho nia kolega feto ida kontinua viajen ba Venilale too tuku 08:00, iha neebe komunidade sira hetan no informa ba parte familia katak, matebian hamriik hamutuk ho joven feto mane iha estrada publiku Venilale no fila uma iha tuku 12:00 kalan.
Fila husi Venilale ba uma tula husi joven mane oan ida ho motor, maibe too area uma nian, matebian deside no lakohi tuun husi motor tanba tauk familia, nunee matebian obriga joven refere atu tula hikas matebian ba toba iha Venilale.
Hafoin matebian ho joven refere ho motor tenta halai fila, maibe mosu matebian nia maun nain 2 hodi duni tuir no konsege kaer matebian iha area Liaoli hodi lori hikas matebian ba uma iha area Badoho’o.
“Nia too tur tiha hau hateten, o halo hanesan nee hatun hau nia dignidade, ema koalia ita aat nee aat natoon, tuur hakmatek aban bainrua mane diak ga aat mak ida nee. Apa koalia oinsa mos hau nia destinu mak nee ona hau tenke tara aan. Ida nee mak hau basa, maibe hau basa hanesan hanorin,” haktuir Pedro do Rosario ba jornalista sira iha Vila Nova, Baukau, Kuarta (12/03/2025)
Aman matebian nee haktuir tan, matebian forma ona uma kain ho mane ida no daudaun iha ona oan nain ida, idade liu tinan 1, maibe divorsiu ona, nunee parte familia limita hodi matebian labele lao kalan, maibe vitima hatan ho lian kroat katak destinu mak lao nunee ona, atu oinsa mos tenke tara aan.
Pedro sublina, rona liafuan nee husi matebian halo parte familia fuan moras, nunee aman deside basa iha matebian nia hasan, maibe iha loron 11 Marsu 2025, parte meudia pur volta tuku 12:00 matebian konsege hakotu vida liu husi tara aan iha sukaer hun besik uma hela fatin.
Nia fundamenta, hafoin haree matebian tara aan iis laiha ona, nia parte kontaktu kedas Polisia Eskuadra Postu Venilale no too fatin hodi asegura matebian nia mate isin.
“Horiseik polisia sira too hau dehan, hau nuudar nia aman hau baku hanesan hanorin, tanba nee hau husu labele lori ba, maibe polisia dehan nee ordem, prontu,” Pedro argumenta.
Matebian nia mate isin parte polisia lori ona ba Hospital Nasional Guido Valadares hodi submete ba prosesu autopsia. No familia deskofia matebian tara aan, tanba hanoin barak, relasiona ho divorsiu neebe nia enfrenta.
Too notisia nee publika, STL seidauk halo konfirmasaun ho parte Autoridade Seguransa Komando Polisia Munisipiu Baukau, tanba kazu refere sei iha prosesu investigasaun.
Entretantu kazu tara aan nee akontese iha Suku Badoho’o, Postu Administrativu Venilale, Munisipiu Baukau, iha loron 11 Marsu 2025.
(EST 1)
