DILI, STLTIMORLESTE.com – Tribunal Judisial Primeira Instansia Dili (TJPID) liu husi despaixu ikus ba prosesu Primeiru Interogatoriu, deside hodi aplika medida Prizaun Preventiva ba arguidu nain rua (2), tanba komete krime hasoru lezada inisial EA ho nia namoradu iha area Hali Dolar Hera.
Arguidu ho inisial J no M lori mai iha Tribunal, no husi parte Ministeriu Publiku (MP) promove ho krime haat, koasaun seksual ho forma Agravadu, krime Raptu, krime Arma branka no krime Ofensas integridade fizika simples.
Iha prosesu nee Juiz José Maria halo tiha identifikasaun ba arguidu nain rua, ikus mai deside hodi tama ba iha faze alegasaun husi Ministeriu Publiku no parte Defeza nian.
Nunee iha alegasaun Ministériu Publiku reprezenta husi Prokurador Aderito Tillman, husu Tribunal atu aplika medida koasaun Prizaun Preventiva ba arguidu nain rua hodi asegura prosesu investigasaun, tanba arguidu nain ida mak parte autoridade seguransa seidauk detein.
Nunee mos parte defeza husu Tribunal atu aplika medida koasaun Aprezentasaun Periodika ba nia kliente nain rua, atu aprezenta aan iha eskuadra neebe hela besik ba kada semana ida dala rua.
Rona tiha alegasaun nee, Tribunal deside aplika medida koasaun Prizaun Preventiva ba arguidu nain rua, tanba konsidera iha indisiu forte ba krime neebe mak MP promove mai iha Tribunal.
Rekorda fali katak, ligasaun ho prosesu nee iha arguidu nain lima, ida mak seidauk detein, maibe antes nee Tribunal mos julga ona arguidu nain rua. Liu husi despaxu hodi aplika medida koasaun prizaun preventiva ba arguidu nain rua ho inisial JG no UF.
Arguidu nain rua JG no UF mos MP promove ho krime haat mak hanesan krime Sukuestru, Raptu, Koasaun Seksual ho Forma Agravadu no krime Arma Branka.
Prosesu nee prezide husi Juiz José Maria, Ministeriu Publiku reprezenta husi Prokurador Aderito Tillman no arguidu nain rua hetan asistensia legal Advogadu privadu nain rua.
(ter)
