DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu ho inisial AG, tanba deskonfia komete krimi Abuzu Seksual ba Menor.
Prosesu refere Ministeriu Publiku Napoliao da Silva promove arguidu mai iha Tribunal ho krimi Abuzu Seksual ba Menor.
Juiza Turnu Ersilia de Jesus halo tiha identifikasaun ba arguidu, ikus mai Juiz prosesu deside hodi aplika medida prizaun preventiva ba iha arguidu.
Tuir Defeza arguidu nian, Defensor Publiku Fransisco Martins katak, Tribunal liu husi despaisu ikus, deside aplika medida prizaun preventiva ba arguidu, tanba konsidera iha indisus ba krimi neebe Ministeriu Publiku promove mai iha Tribunal.
“Tribunal aplika medida Prizaun Preventiva ba nia, tanba iha indisus pratika krimi Abuzu Seksual ba Menor, tanba nee iha perigu kontinuasaun ba atividade kriminoza, perigu de fuga, tanba nee Tribunal nia entendimentu aplika medida koasaun ba iha arguidu nee,” dehan Fransisco ba jornalista sira iha Tribunal, Dili, Sesta (07/03/2025).
Nia hatutan, prosesu primeiru interrogatóriu Tribunal deside aplika medida sira, no ba iha prosesu ida nee Tribunal entende Prizaun Preventiva mak diak.
Medida neebe Tribunal aplika defeza sei foti despaisu husi Tribunal, depois mak haree atu halo rekursu ka lae.
Tuir kronolojia katak, kazu nee akontese iha Munisipiu Likisa, area Leorema nian, no akontese iha tinan 2023 depois liu husi mandadu detensaun mak kaptura asistidu nee, hodi kompleta 72 horas depois submete mai iha Tribunal.
Prosesu ida nee prezide husi Juiz Turnu Ersilia de Jesus, Ministeriu Publiku reprezenta husi Prokurador Napoliao da Silva, arguidu hetan asistensia legal husi Defensor Publiku Fransisco Martins.
(ter)
