DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interogatoriu, deside aplika medida Termu Identidade Rezidensia (TIR) ba arguidu ho inisial D.
Prosesu refere lori mai iha Tribunal no Ministeriu Publiku promove arguidu ho krimi Arma Branka. Depois de Juiz Turnu Jose Gonsalves halo tiha identifikasaun ba arguidu, no ikus mai liu husi despaisu ikus deside aplika medida TIR ba arguidu.
Tuir Defeza Eustaqio Guterres katak, Tribunal mantein ho medida neebe antes nee polisia aplika ona ba arguidu.
“Mantein nafatin TIR neebe antes nee Polisia aplika tiha ona, tanba Tribunal rasik haree la iha indisus ida hodi akuza arguidu, ho ida nee Prokurador rasik husu aplika medida Aprezentasaun Periodika,” dehan Defeza Eustaquio Guterres ba jornalista STL iha Kaikoli, Kinta (17/07/2025).
Nia hatutan, iha alegasaun defeza haree katak la iha indisus forte, tanba nee husu Tribunal atu aplika medida TIR, no ikus mai Tribunal afavor ba iha defeza nian hodi kontinua aplika medida TIR ba arguidu.
Esplika tan, prosesu refere aplika medida TIR laos atu prosesu nee remata ona, maibe Prokurador kontinua halao nia servisu hodi halo investigasaun, medida refere asegura deit arguidu ba iha investigasaun.
Defeza reforsa, kazu nee akontese iha Aimutin, mosu dezentendimentu entre lezadu no arguidu, lezadu mak ba iha arguidu nia uma hodi baku sasan rahun, tanba nee arguidu mos foti katana ida atu defende aan, laos foti katana ho intensaun atu taa lezadu.
Prosesu nee prezide husi Juiz turnu Jose Gonsalves, Ministeriu Publiku reprezenta husi Prokurador Pedro Baptista, arguidu hetan asistensia legal husi Defensor Publiku Eustaqio Guterres.
(ter)
