DILI, STLTIMORLESTE.com – Tribuna Judisial Primeira Instansia Dili halao julgamentu ba arguidu ho inisial DP hanesan sidadaun estanjeiru, neebe deskonfia komete krimi Koasaun Seksual hasoru vitima nain rua (2).
Ministeriu Publiku promove arguidu mai iha Tribunal ho krimi Koasaun Seksual neebe hasoru feto nain rua, iha fulan balu iha tinan ida nee nia laran.
“Arguidu Tribunal aplika media Aprezentasaun Periodika (AP) ba arguidu, hodi hein prosesu investigasaun,” dehan fontes konfirmadu ba STL iha Tribunal, Dili, Segunda (10/03/2025).
Arguidu lori mai iha Tribunal, tanba liu husi mandadu neebe iha autoridae seguransa sira halo hodi detein arguidu durante oras 72 hodi submete ba iha prosesu primeiru interogatoriu.
Iha despaisu ikus, Juiz Turnu Ersilia de Jesus deside, hodi aplika medida Aprezentasaun Periodika ba arguidu, atu aprezenta aan kada fulan ba iha Eskuadra Polisia neebe hela besik ba.
Antes nee iha alegasaun, Ministriu Publiku liu husi Prokurador Pedro Baptista husu Tribunal atu aplika medida prizaun preventiva ba arguidu. Enkuantu husi parte defeza husu Tribunal atu aplika medida aprezentasaun periodika ba arguidu.
Tanba nee ikus mai Tribunal tetu hodi aplika media Aprezentasaun Periodika ba arguidu.
Prosesu ida nee prezide husi Juiz Turnu Ersilia de Jesus, Ministeriu Publiku reprezenta husi Prokurador Pedro Baptista, arguidu hetan asistensia legal husi Advogadu Privadu, Pedro Camões.
(ter)
