DILI, STLTIMORLESTE.com – Tribunal Judisial Primeira Instansia Dili liu husi despaisu ba prosesu primeiru interogatoriu, deside hodi aplika medida Aprezentasaun Periodika (AP) ba arguidu nain haat (4) ho inisial BS, MB, BM no RBS.
Arguidu nain 4 Ministeriu Publiku promove mai iha Tribunal ho krimi Danu Simples no mos krimi Ofensa Integridade Fizika Grave neebe previstu iha artigu 146 husi Kodigu Penal.
Halo tiha indentifikasaun ba arguidu nain 4, ikus mai Juiz turnu Jose Gonsalves deside hodi aplika medida Aprezentasaun Periodika ba arguidu nain 4.
“Tribunal aplika medida Aprezentasaun Periodika fulan ida dala rua atu arguidu sira aprezenta aan iha Ministeriu Publiku neebe lokaliza iha Ermera Fatugeru,” dehan Defeza Manuel Exposto ba Jornalista sira iha Kaikoli, Sesta nee.
Nia hatutan, iha alegasaun Prokurador husu Tribunal atu aplika medida Aprezentasaun Periodika ba arguidu nain 4, maibe husu parte defeza husu atu aplika medida Termu Indentidade no Rezidensia (TIR).
Hanesan defeza aseita ho medida refere, tanba sei faze investigasaun nia laran.
Tuir kronolojia katak, akontesimentu nee akontese iha Munisipiu Ermera, mosu dezentendimentu entre arguidu no lezadu sira, ikus mai arguidu sira halo agresaun ba lezadu.
Prosesu Primeiru Interogatoriu nee prezide husi Juiz turnu Jose Gonsalves, Ministeriu Publiku reprezenta husi Prokurador Ricardo Leite, arguidu hetan asistensia legal husi Defensor Publiku Manuel Exposto.
(ter)
