DILI, STLTIMORLESTE.com – Tribunal Judisial Primeira Instansia Dili kontinua halao julgamentu ba kazu neebe envolve husi arguidu nain tolu (3) ho inisial JXB, MdC no DNS neebe hasoru lezadu ho inisial AS.
Tuir akuzasaun neebe mai husi Ministeriu Publiku katak, iha loron 28 Janeiru 2022, tuku 8:30 kalan, arguidu JXB kontaktu ba lezadu AS liu husi telemovel no konvida lezadu atu ba hemu kafe iha jardim Motael Dili, ho intensaun atu koalia kona-ba projetu eletrisidade.
Hafoin kontaktu lezadu ho nia kolega inisial DP ba iha fatin neebe determina husi arguidu JXB. Bainhira too iha fatin refere, parte lezadu hasoru malu ho arguidu no sira koalia kona-ba asuntu neebe temi ona.
No lezadu haree arguidu haruka mensajen, maibe lezadu la hatene arguidu haruka mensajen ba se. Hafoin lezadu koalia hela ho arguidu JXB, ema neebe arguidu haruka mensajen ba nee la kleur deit sira mos mai.
Sira nee mak hanesan arguidu JXB hamutuk ho arguidu MdC no DNS no ema sira neebe nia la konhese, no diretamente halo agresaun ba lezadu, tuku iha ibun, hirus matan no kuaze isin tomak.
Hafoin halo ataka fiziku ba lezadu, sira kontinua lori lezadu ba Kuartel Jeral PNTL iha Kaikoli Dili. Bainhira too iha sala investigasaun iha Kuartel Jeral PNTL Kaikoli Dili, arguidu DNS obriga lezadu asina dokumentu neebe sira prepara tiha ona, maibe lezadu lakohi asina.
Nune arguidu DNS tuku iha lezadu nia hasan sorin loos no kontinua tuku lezadu iha kakorok too monu ba rai no halo moras no kanek.
Sira obriga lezadu atu asina dokumentu nee, maibe lezadu lakohi no arguidu DNS kaer lezadu nia liman no asina dokumentu nee.
Arguidu sira laiha autoridade atu detein ema seluk, maibe arguidu sira JXB, MdC no DNS uza sira nia autoridade nudar membru F-FDTL hodi halo asaltu fiziku ba parte neebe hetan kanek, hodi obriga sira tenke asina dokumentu neebe sira prepara tiha ona.
Arguidu sira tula lezadu ho kareta neebe laiha numeru xapa matrikula ba Kuartel Jeral PNTL, iha neebe sira asalta ho fiu eletrisidade metan iha nia isin lolon tomak.
Arguidu sira bainhira halao aktu sira neebe deskreve, sira hatene katak lei bandu, sira atua ho livre, deliberada no konxiente, no la hadook aan husi hahalok hanesan nee. Sira hakarak atu estraga parte neebe hetan kanek iha nia integridade fiziku, hodi hamosu moras no kanek sira, neebe maka akontese duni.
Arguidu sira tau lezadu iha sala investigasaun iha Kuartel Jeral PNTL, la konsege sai husi fatin, asalta nia ba objetivu ida nee, nunee hasai nia liberdade, neebe sira hotu hakarak halo ho livre no ho konsiensia.
Maizumenus iha tuku 11:00, arguidu sira tula fali lezadu neebe ho kondisaun grave ona, iha kareta ida no husik hela iha area Palapaso, Dili.
Arguidu sira hatene didiak katak sira nia hahalok hetan bandu no punivel husi lei nuudar krimi, no nunee viola dever sira neebe iha sira nia estatutu nudar membru F-FDTL no funsionariu publiku sira, liu-liu dever imparsialidade, laran manas, lealdade no integridade, hodi tau iha risku interese Estadu nian no legalidade asaun husi ninia orgaun hotu hotu no ninia ajente sira-nia onestidade, nuudar indispensavel ba kondisaun sira ezersisiu ba sira nia funsaun publika.
Tanba nee Ministeriu Publiku akuza arguidu nain tolu komete Krimi Sukuestru no Abuzu Poder neebe previstu iha artigu 160 no artigu 297 husi Kodigu Penal.
Antes nee Tribunal rona ona deklarasaun husi arguidu nain tolu, tanba nee iha julgamentu kontinuasaun nee Tribunal deside hodi rona deklarasaun husi lezadu.
Iha sala julgamentu laran lezadu deklara katak, konhese arguidu sira no momentu neeba lezadu hetan kontaktu husi arguidu JXB atu ba hemu kafe iha Motael, hodi koalia kona-ba kaer projeitu nunee lezadu mos ba.
Lezadu deklara, momentu neeba lezadu sira tur hela haree arguidu kontaktu ba nia kolega sira, la kleur arguidu nia kolega sira mos mai ho kareta rua, ema sira nee inklui mos arguidu MdC no DNS, iha mos ema sivil balu maibe nain tolu mak lezadu konhese, restu lezadu la konhese ida.
Lezadu deklara, ema sira nee tun husi kareta diretamente dada lezadu hodi halo agresaun hanesan tuku tebe, kontinua halo hanesan nee iha estrada no tama iha kareta laran mos kontinua halo agresaun hanesan tuku no tebe ba lezadu.
Lezadu deklara, arguidu sira tula lezadu ba kareta mai iha Diresaun Kaikoli Tribunal nia oin, momentu neeba Tribunal seidauk harii fatin oituan nee nakukun hela, arguidu sira hamate tiha kareta, hodi kontinua halo agresaun ba lezadu.
Lezadu deklara, depois arguidu sira kontinua lori lezadu ba iha Kuartel Jeral PNTL no haruka lezadu atu asina dokumentus ida, maibe lezadu rejeita hodi lakohi asina. Tanba nee arguidu DNS tuku lezadu no lezadu monu tiha, kontinua kaer lezadu nia liman hodi obriga asina.
Lezadu deklara, depois hotu arguidu DNS kontinua lori fiu metan baku ba iha lezadu, depois hotu sira tula lezadu ba hatun hela iha Palapasu mak lezadu husu fali ajuda ba ema balu hodi lori lezadu ba iha Hospital.
Lezadu deklara, momentu akontese problema nee lezadu halao hela knaar hanesan informasaun sekreta, neebe sira nia xefi mak mane ida ho inisial RNR.
No mane refere mak haruka lezadu halao knaar atu rekolha sasan sira neebe hanesan arma branka, hodi hatoo ba iha Polisia, no servisu nee lezadu halao durante fulan rua deit.
Lezadu deklara, kona-ba dehan lezadu bosok komunidade sira hodi halo kobransa ilegal ida nee lalos, lezadu mos hanesan ema babain la kaer projetu ida. No lezadu deklara, arguidu nain rua neebe baku lezadu mak arguidu JXB no DNS, maibe arguidu MdC la baku ida koalia deit, no lezadu konhese arguidu sira hanesan membru F-FDTL.
Rona tiha lezadu, Tribunal adia ba loron 10 fulan Junhu hodi kontinua rona sasin.
Audensia julgamentu nee prezide husi Juiz Koletivu, Ana Paula, Ersilia de Jesus, Jose Maria, Ministeriu Publiku reprezenta husi Prokurador Aderito Tilman, arguidu sira hetan asistensia legal husi Defensor Publiku Sergio Dias Quintas.
(ter)
