BAUKAU, STLTIMORLESTE.com – Deskonfia mosu konfrontu entre sidadaun balu iha Aldeia Kaiubulale, Suku Kaibada, Postu Administrativu Baukau Vila, Munisipiu Baukau, uma barak hetan ameasa ba sunu ka insendiu inklui sasan Uma nian balu no karreta bis ida rahun.
Informasaun nee hatoo husi Xefe Suku Kaibada, Cosme da Costa Lopes ba jornalista sira iha Uatulete, Kurta (13/11/2024).
“Tuir informasaun neebe iha, dapur ida sunu, maibe la konsege ahi han total, maibe iha mos sasan seluk neebe lubuk ida kuaze hetan estragus, nomos karreta balun hetan tuda,” dehan nia.
Husi konfrontu nee nia dehan, rezulta dapur ida konsege hetan sunu, maibe la konsege mutuk, tanba parte komunidade husi Aldeia refere tenta kontaktu kedas ba parte Bombeiru Baukau hodi halo atuasaun.
Husi kontaktu nee mak parte ekipa Bombeiru too tarde iha fatin akontesimentu uma hela barak iha area nee bele afeta ba insendiu, tanba distansia uma besik malu inklui mos uma lisan balu.
Portantu motivu ba konfrontu entre sidadaun sira nee, parte Suku seidauk hatene, tanba akontese iha tuku 01:00 madrugada (loron 13 Novembru 2024), maibe entrega ona ba parte seguransa hodi buka tuir motivu ba konfrontu refere.
Hatan ba kestaun nee, Komadante Polisia Munisipiu Baukau, Superintendente Xefe Polisia Antonio Maria de Sa hateten, ligadu informasaun konfrontu iha Kaibada Makasae tenta atu sunu uma komunidade balun nee, laloos, tanba ekipa patrulha too kedas fatin refere laiha konfrontu, maibe iha duni uma Baraka ida mak afeta ba insendiu neebe deskonfia labarik kiik sira halimar mak hodi sunu.
Entretantu situsaun iha Baukau, durante selebra loron 12 Novembru lao hakmatek, tanba joven iha ona maturidade kontribui paz no estabilidade.
(EST 2)
