DILI, STLTIMORLESTE.com – Tribunal Judisial Primeira Instansia Dili halao julgamentu ba arguidu nain 3 ho inisial MSB, CC no JB, tanba deskonfia komete krimi hasoru lezadu ho inisial SSA.
Iha sala julgamentu laran, Juiz Prosesu Jose Maria lee sai akuzasaun katak, iha loron 26 fulan Julhu tinan 2021 iha area Laurehou, Lisapat, lezadu fila ba uma iha oras 00h00, too iha dalan haree arguidu MSB hein hela lezadu ho katana ida iha liman.
Bainhira lezadu lao besik ba iha arguidu, imediatamente arguidu taa kedas lezadu nia ain parte los dala ida, lezadu monu kedas ba rai hodi hakilar.
Arguidu MSB nega katak, laos mak uza katana hodi taa lezadu maibe arguidu JB mak taa lezadu.
“Lezadu hase arguidu katak, “Nusa o taa fali hau, arguidu dehan tan o hadeer ka book aan hau ta mate kedas o, maibe parte seluk arguidu MSB nega katak, laos arguidu mak taa lezadu, maibe arguidu JB mak taa lezadu,” dehan akuzasaun nee.
Nunee lezadu nia maun VT too arguidu sira husik tiha motor hodi halai liu, VT dudu arguidu sira nia motor ba uma ho hirus VT lori ai baku rahun motor nia body.
Tanba nee Ministeriu Publiku akuza arguidu sira ho krimi rua, Ofensa Integridade Fizika Grave iha artigu 146 no krimi Arma Branka lei numeru 5/2017.
Tribunal lee tiha akuzasaun, arguidu sira hili direitu koalia, tanba nee tribunal adia ba loron 8 fulan Maiu hodi rona deklarasuan husi arguidu nain 3.
Audensia julgamentu nee prezide husi Juiz Koletivu, Jose Maria, Ana Paula, Ersilia de Jesus, Ministeriu Publiku reprezenta husi Prokurador Ricardo Leite, arguidu sira hetan asistensia legal husi Defensor Publiku, Manuel Amaral.
(ter)
