DILI, STLTIMORLESTE.com – Membru Corpo Seguransa Pesoal (CSP) balu husi Polisia Nasional Timor Leste (PNTL) ho inisial MTJDR, deskonfia fasilita arma kilat ba sidadaun estranjeiru Xineza balu, hodi halao treinamentu ka modalidade tiru iha area Kaitelu, Suku Ulmera, Postu Administrativu Bazartete, Munisipiu Likisa nian.
Tuir Portavos PNTL Interino Superiendente Polisia Moizinho Coreia katak, sidadaun estranjeiru neebe mai husi nasaun balu neebe tama iha territoriu nasional Timor Leste nian, neebe halo amizade diak ho membru Polisia CSP balu, hodi hetan treinamentu tiru.
Portavós nee rekonhese katak, deskonfia duni membru CSP balu fo kilat ba sidadaun estranjeiru balu hodi tuir treinu tiru.
“Hau hanoin los duni katak, viral iha media sosial iha video ida neebe deskonfia katak, iha involvimentu membru seguransa pesoal ida husi PNTL neebe fo arma ba sidadaun estranjeiru balu husi tiru,” hatete Portavos PNTL Interino Superiendente Polisia Moizinho Coreia ba jornalista sira iha salaun Ministeriu Interior Vila Verde, Kinta (02/10/2025).
Nia dehan, Komando PNTL toma ona atensaun hodi fo medida loke prosesu investigasaun ba membru CSP balu neebe seidauk identifika lo-loos ninia inisial sira.
“Maibe kona-ba ida nee prosesu lao hela, sese mak involve ita sei haree, pelumenus semana oin hanesan nee bele update ba ita boot sira,” nia esplika.
Nia hatutan, bainhira prosesu lao, sese deit mak hola parte iha krimi ida klaru katak, Komando PNTL sei bolu hotu hodi halo investigasaun.
Nunee, bainhira prosesu investigasaun konklui sei haruka ba iha Ministeriu Publiku no Ministeriu Publiku orienta intervente sira neebe mak presiza prosesu.
“Hau seidauk hatete katak, aktu husi membru CSP, ita sei halo investigasaun, prosesu sei lao. Se deit involve iha krimi ida sei investiga hotu,” nia informa.
Nia afirma, iha nasaun TL iha instituisaun 3 hanesan PNTL, F-FDTL no PSIK mak kaer arma, nunee klaru katak, fasilita kilat nee husi membru CSP neebe husi PNTL nian.
Entretantu asuntu nee jornalista sira atu konfirma ba Komandante Jerál PNTL Komisariu Jerál Polisia Henrique da Costa, maibe preokupa hela ho servisu.
Jornalista: Jeniche da Costa
Editora: Domingas Gomes
