BAUKAU, STLTIMORLESTE.com – Deskonfia pesoal polisia ida falsifika dadus veteranu iha tinan 2003, neebe daudaun hetan pensaun ho eskalaun partisipasaun ba tempu inteiru 8a14.
“Veteranu no rezistensia iha Munisipiu Baukau deskofia forte, JDCS halo falsifikasaun dadus inventa partisipasaun no dedikasaun luta ba Libertasaun Patria hodi simu pensaun veteranu ho eskalaun partisipasaun ba tempu inteiru 8a14 ho nivel G3,” hateten porta voz Filipe V. da Costa Belo liu husi komunikadu imprensa, neebe realiza iha Vila Antiga, Segunda (10/03/2025).
Nia sublina, relasiona asuntu nee, responsavel Organizasaun Masa, Responsavel Kaixa no Estafeta Nurep Selkom no Ativista iha Munisipiu Baukau ezije no husu parte relevante sira atu prosesu no investiga, tanba deskofia pesoal refere falsifika dadus hodi hetan pensaun husi Estadu Timor Leste.
Nia fundamenta, evidensia seluk neebe iha mak hanesan, pesoal membru polisia refere moris iha Suku Uma Uain Kraik, Postu Vikeke, Munisipiu Vikeke, iha tinan 1979, neebe tempu okupasaun Indonezia, evakua husi moris fatin hamutuk ho familia hela iha Bairu Central, Suku Bahu, Postu Baukau Vila.
No durante moris husi idade kiik too boot, pesoal refere hela iha Bahu la involve, la partisipa no la halo dedikasaun atividade servisu ba prosesu luta libertasaun patria, maibe hafoin Timor ukun aan no iha tinan 2003 bainhira Estadu Timor Leste fo rekonhesimentu ba luta nain sira, pesoal polisia refere konsege simu pensaun veteranu ho eskalaun partisipasaun ba tempu inteiru 8a14 ho nivel grau 3.
“Ami rekere ba Ministeriu no Prezidente Kombatentes Libertasaun Nasional atu konsidera ami nia reklamasaun nee, hodi hapara imediata nia pensaun no prosesu ba justisa neebe vigora iha Timor Leste,” akresenta porta voz nee.
Enkuantu Veteranu João Buka Tuir deskorda ho pesoal polisia refere, tanba deskofia falsifika dadus veteranus neebe rejistu iha fisa CCLN, pesoal polisia refere hetan kastigu tinan 8 iha tempu Indonezia neebe rejistu iha tinan nee 2003.
“Nee presiza halo investigasaun diak, bolu tekniku sira, JDCS no nia testamunha sira no mos tinan 8 nia kastigu nee hamutuk ho se no iha neebe para responsabiliza dokumentus nee,” hateten João Buka Tuir.
Aleinde mos veteranus nee informa, mezmu pesoal polisia refere simu hela pensaun veteranu rejistu 2003 too ohin loron, maibe naran kombatentes neebe rejistu iha tinan 2009, pesoal polisia refere naran taka sai tan ona iha lista edital 2025.
“Nia ema ida, maibe fisa 2, entaun ita hakarak rekomenda ba Ministeriu Asuntu Kombatentes Libertasaun Nasional prezisa fo atensaun,” rekomenda João Buka Tuir.
(EST 1)
