DILI, STLTIMORLESTE.com – Deskonfia funsionariu balu iha Diresaun Munisipal Konservatoriu Servisu Rejistu Notariadu Munisipiu Dili sai broker, oras nee daudaun tama ona iha faze inspesaun no investigasaun.
“Hau halo ona instrusaun hodi halo averiguasaun, no agora tama daudaun iha faze inspesaun,” dehan Ministrua Justisa, Sergio Hornai ba jornalista sira iha Kolmera, Dili, Tersa (04/02/2025).
Nia hatutan, deskonfia iha buat ruma neebe mosu halo daudaun averiguasaun, atu hatene informasaun sira nee. No agora mos tama iha faze investigasaun, atu nunee Gabinete Inspesaun Auditoria bele iha serteza absoluta katak, iha duni infrasaun ka lae.
Iha fatin ketak, Komisariu Komisaun Anti Korrupsaun (KAK), Rui Pereira dehan, husi parte KAK nian sei buka tuir. ”Ami mos sei buka tuir, tanba nee sei tau baner KAK nian, atu hotu-hotu servisu ho fuan ho laran, no servisu ba rai ida nee ho osan ida neebe ita nia direitu, no osan neebe ema seluk nia direitu labele ba foti,” dehan nia.
Aleinde nee, Akademiku Universidade Nasional Timor Lorosae (UNTL), Sebastião Dos Santos afirma, aktu sira hanesan nee labele tolera, kuandu identifika iha duni indisus ruma, tenke prosesa tuir lei neebe iha, tanba ema hotu iha lei nia okos.
(ter)
