BAUKAU, STLTIMORLESTE.com – Kareta trek Sambere hetan tuda husi area Postu Administrativu Venilale too Baukau Vila hodi rezulta vidru oin rahun, tanba deskonfia naok karau.
Vitima Leonsi Henrique Guterres konta, iha loron 17 Maiu tinan nee, parte kalan, hamutuk familia sira tula karau timur ida iha kareta trek Sambere ho sapa matrikula 58.969 husi Suku Uai-Oli, Postu Venilale, objetivu atu ba Dili realiza serimonia kazamentu, maibe hetan tuda iha dalan.
Nia sublina, tuda refere mosu hahu husi asaun hakilar ho liafua “para para” iha area Benduku, Suku Berkoli, Postu Venilale, maibe kareta la para hodi kontinua viajen, maibe la kleur mosu motor besik unidade 10 deskonfia utiliza husi joven sira neebe hakilar mosu hodi ultrapasa kareta tenta korta kareta iha estrada klaran, maibe kareta la para, tanba kundutor foti ses dalan hodi kontinua viajen.
Hafoin foti ses dalan hodi ultrapasa, komesa hetan tuda husi joven sira iha area Benduku, maibe kontinua viajen liu husi dalan alternativu Diresaun Loilubu-Ostiku-Triloka, maibe husi diresaun refere kuaze hetan tuda tu-tuir dalan, neebe too Triloka Postu Bakau Vila hetan impede husi kareta trek ida, nunee vitima sira foti dalan alternativu ba diresaun estrada publika Komponente FALINTIL-Forsa Defeza Timor Leste (F-FDTL) Lanud Baukau hodi para kareta besik edifisiu Komponente Forsa Terrestre Baukau.
Nunee vitima sira husu ajuda ba membru F-FDTL hodi kontaktu Komando Polisia Munisipiu Baukau liu husi Polisia Eskuadra Postu Baukau Vila too iha vitima sira no kontinua ba edifisiu Komando Polisia Baukau.
“Tansa sa tuda hau la hatene, ami hatene tula karau ida atu ba Dili mak sira dehan karau neebe ami tula nee naok sira nia, hateke mai hau nee, hau nee naok ten nian ga,” hateten Eis Xefe Suku Uai-Oli, Leonsi Henrique Guterres ba jornalista sira iha Vila Nova Baukau, Sesta nee (23/05/2025).
Durante viajen husi Uai-Oli atu ba partisipa serimonia kazamentu iha Dili, kareta trek Sambere tula karau ho familia nain tolu akompanha karau iha parte kareta kotuk no nain rua inklui ho kundutor iha oin, maibe asaun tuda husi area Benduku Berkolo too Triloka Baukau la rezulta ema kanek no kareta mak hetan estragus.
“Fatuk kona kareta hanesan udan tau kona kareta nia odamatan vidru oin no seluk tan, se kona kundutor kalan nee ami la moris,” Leonsi Henrique Guterres akresenta.
Kondisaun kareta estragus mak vidru oin rahun no asesoria seluk tan daudaun asegura ona iha Komando Polisia Munisipiu Baukau, tanba nee STL tenta atu konfirma Komadante Komando Polisia Munisipiu Baukau, maibe parte Departamentu Gabinete hatan, relatoriu ba kazu refere seidauk too iha Komandante Munisipiu.
Entretantu observasaun iha terenu loron 23 Maiu nee nota katak, Komando Polisia Munisipiu Baukau liu husi Servisu Investigasaun Kriminal identifika ona suspeitu nain 12 ba kazu refere no daudaun iha ona prosesu investigasaun.
(tom)
