DILI, STLTIMORLESTE.com – Relasiona ho konfrontu neebe mak akontese horiseik (20/05/2025) iha Postu Administrativu Kailaku, Munisipiu Bobonaro, deskonfia membru Polisia Nasional Timor Leste (PNTL) tiru mate joven ida, nunee Asosiasaun HAK husu atu investiga klean oknum PNTL hodi hatene lo-loos motivu husi kazu nee.
Tuir kronolojia katak, konfrontu nee akontese iha serimonia isar bandeira nasional ba Loron Restaurasaun Independensia Independensia Republika Demokratika Timor Leste ba dala 23, nunee mosu konfrontu duni malu entre joven sira, ikus mai deskonfia oknum membru PNTL tiru mate joven ida.
Visi Diretor Asosiasaun HAK, Antonino de Limas hatete, konfrontu iha Kailaku momentu neeba sira tuir hela eventu komemorasaun loron Restaurasaun Indepedensia 20 Maiu ba dala 23, nunee mosu konfrontu too deskonfia membru oknum PNTL tiru mate joven ida
“Tuir fali mai ita haree problema nee entre joven ho joven baku malu, tuir informasaun polisia baku ka tiru joven ida too mate fatin, ida nee mos ita rona deit informasaun, maibe atu klaru nee presiza investiga klean autor sira neebe involve iha kazu nee, atu haree lo-loos motivu husi kazu nee oinsa,” dehan Visi Diretor Asosiasaun HAK ba jornalista STL iha edifisiu HAK Farol, Dili, Kuarta (21/05/2025)
Nia aumenta, kazu nee entrega ba polisia investigasaun atu haree kazu nee diak, importante mak investiga ho lo-loos atu nunee sidadaun no sosiedade sira nafatin iha konfiansa ba polisia nia servisu no nia knaar sira hodi sira halo servisu nee tuir duni lei no ordem.
“Kazu nee presiza halo investigasaun klean tanba rezulta ema ida mate, kuandu mate ona nee bele sai aktu nee bele mos sai hanesan krimi, hein rona justifikasaun karik polisia tiru duni ou bele mos ema seluk, entaun investigasaun nee mak tenke klean no lo-loos ho nunee familia sira mos hetan justisa,” katak nian.
Nia sublina, konfrontu nee entre se ho se, ita seidauk hetan informasaun loos, konfrontu akontese ita haree video no iha media sosial iha maluk balun share nee ita haree polisia la halo ninia servisu lo-loos
“Se ita haree liu video neebe mak share iha kampu nee polisia ho kareta halai, ida nee hatudu katak polisia la halao ninia knaar hodi halo atuasaun ba kualker konfrontu neebe mak akontese,” atak nia.
Nia salienta, lo-loos nee wainhira realiza ona eventu boot nee seguransa husi polisia tenke tau atensaun makaas, tanba momentu ida hanesan nee halibur ema barak, primeiru atu hatete deit katak polisia ninia falhansu mak la tau atensaun ba asuntu seguransa wainhira halibur ema barak.
(EST 1)
