DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu Primeiru Interogatoriu, deside aplika medida Prizaun Preventiva ba arguida feto ida ho inisial YH nuudar sidadaun estranjeiru.
Arguida submete mai Tribunal iha loron Domingu (07/04/2025) no Ministeriu Publiku promove arguida mai iha Tribunal ho krimi Trafiku Ilisitu ba Droga, ho prosesu numeru Nuc, 0090/25.PNSIC.
Iha prosesu nee, Juiz turnu Francisca Marques Cabral liu husi despaisu ikus ba prosesu refere, deside hodi aplika medida Prizaun Preventiva ba arguida.
Tuir Advogadu Privadu, Januario Martins katak, primeiru interogatoriu nee Ministeriu Publiku halo promosaun mai iha Tribunal, atu Tribunal haree indisus sira neebe Ministeriu Publiku aprezenta mai nee forte ka lae. No haree mos ba provas inisial sira neebe iha, atu Tribunal mos iha konviksaun ida atu hili medida saida mak bele aplika ba arguida, hodi asegura prosesu investigasaun neebe sei lao hela.
“Krimi neebe deskonfia mak trafiku ilisitu ba droga, ida nee iha indisiu katak ami nia kliente komete krimi nee, maibe iha prosesu investigasaun mak foin deskobre lo-loos katak, nia envolve ka lae,” dehan nia.
Hatutan tan, iha alegasaun Prokurador haree katak atu asegura investigasaun no krimi sira hanesan nee kompleksu, arguida mos hanesan sidadania estranjeira, Ministeriu Publiku husu Tribunal atu aplika medida Prizaun Preventiva ba arguida.
Maibe iha alegasaun husi parte Defeza nian haree katak, arguida sidadania estranjeira, husu Tribunal bele sita arguida nia pasaporte no aplika proibisaun de auzensia, no mos medida aprezentasaun periodika ba arguida.
Sublina, despaisu Tribunal aplika medida prizaun preventiva ba sira nia kliente, tanba nee hanesan defeza sei halo rekursu ba iha Tribunal Rekursu, tanba la aseita ho despaisu nee. Tanba nee dentru de prazu legal nia laran defeza sei halo rekursu.
Prosesu nee prezide husi Juiz Turnu Fransisca Cabral, Ministeriu Publiku reprezenta husi Prokurador Rogerio Viegas, arguida hetan asistensia legal husi Advogadu Privadu, Januario Martins no Olivio Barros.
Tuir kronolojia katak, Ekipa Konjunta Polisia Nasional Timor Leste (PNTL) husi Diresaun Servisu Investigasaun Kriminal Nasional (DSIK) hamutuk ho Autoridade Aduaneira Alfandega (AAA) Timor Leste detein sidadaun estranjeiru feto ida ho naran inisial YH, deskonfia simu evidensia Droga ho tipu Kokaina 2.94 Kg neebe haruka husi nasaun Fransa mai Teritoriu Timor Leste.
Xefe Interinu DIKN, Superintendente Assistente, Mouzinho Tavares Correia informa, ekipa Konjunta DSIK ho Autoridade Aduaneira Alfandega servisu hamutuk iha loron 02 fulan Abril, deskobre evidensia sasan merkadoria kontra bandu droga kokaina 2.94 Kg iha Aeroportu Internasional Presidente Nicolau Lobato Komoro.
Nia hatutan, hafoin ekipa konjunta prende evidensia pakote droga nee, kontinua buka tuir se mak nain ba sasan nee, maibe iha prosesu identifikasaun deskobre sasan nain iha Fransa mak manda sasan nee mai Timor Leste, depois mak sidadaun estranjeiru feto ida mak simu sasan sira nee iha Timor Leste ho naran inisial YH mak simu, tanba nee ekipa buka tuir konsege detein.
Iha fatin hanesan, Komisariu Autoridade Aduaneira Alfandega, Joanico Pinto hateten, servisu Autoridade Aduaneira Alfandega hamutuk ho DSIK iha PNTL halo atuasaun ba sasan merkadoria kontra bandu tama mai Timor Leste.
“Sasan objetu droga neebe daudaun ita prende ona iha nee liu husi rede Alfandega katak, sasan haruka mai husi nasaun Fransa nia destinasaun ikus mak iha Timor Leste, entaun ita iha rede Alfandega iha mundu tomak alerta mai ami servisu ida ita bolu jestaun risku deskonfia sasan droga nia finalmente sei tama iha Timor Leste,” dehan nia.
(ter)
