DILI, STLTIMORLESTE.com – Tribunal Judisial Primeira Instansia Dili liu husi despaisu ikus ba prosesu primeiru interogatoriu, deside aplika medida Prizaun Preventiva ba arguidu nain 3 ho inisial CCGC, ENPB no JHFG, tanba deskonfia sona lezadu OO hanesan eis trabalhador GMN iha tinan 2022.
Arguidu nain 3 lori mai iha Tribunal no Ministeriu Publiku promove arguidu nain 3 ho krimi omisidiu agravadu ho forma tentada neebe previstu iha artigu 139 Kodigu Penal.
Tribunal liu husi Juiz Turnu, Jose Quintao iha despaisu ikus deside aplika medida Prizaun Preventiva ba arguidu nain 3.
Tuir Defeza arguidu sira nian, Marinho da Cruz deklara katak, Tribunal aplika medida Prizaun Preventiva ba arguidu sira, hanesan defeza la aseita no sei halo rekursu.
“Tribunal aplika medida Prizaun Preventiva, tanba razaun atu asegura arguidu sira atu provas labele lakon, maibe ami sei halo rekursu tuir prazu neebe iha,” dehan nia ba jornalista STL iha Kaikoli, Segunda (14/04/2025).
Nia hatutan, iha alegasaun mos Prokurador husu Tribunal atu aplika medida Prizaun Preventiva, atu asegura arguidu sira iha Prizaun durante prosesu investigasaun nia laran.
Husi parte defeza nian entende katak, arguidu sira kolabora ho justisa, tanba nee husu Tribunal atu aplika Medida Aprezentasaun Periodika ba arguidu sira. Maibe Tribunal deside oin seluk, hanesan defeza prepara rekursu hodi hatama ba Tribunal hasoru despaisu nee.
Tuir kronolojia katak, iha loron 12 fulan Abril tinan 2022, iha Matadoru, Aldeia 01 Setembru, Suku Vila Verde, Postu Administrativu Vera Kruz, Munisipiu Dili, akontese problema ida neebe deskonfia arguidu nain 3 sona lezadu ho inisial OO, hanesan eis trabalhador GMN.
Prosesu nee prezide husi Juiz Turnu Jose Quintao, Ministeriu Publiku reprezenta husi Prokurador Renato Bere Nahac, arguidu nain tolu hetan asistensia legal husi Advogadu Privadu nain tolu, Arlindo Sanches, Marinho da Cruz, Napoliao de Olivera.
(ter)
