DILI, STLTIMORLESTE.com – Tribunal Judisial Primeira Instansia Dili (TJPID) iha loron Kinta nee (23/07/2026) liu husi despaisu ba prosesu primeiru interogatoriu, deside aplika medida Aprezentasaun Periodika (AP) ba arguidu ho inisial JMdS.
Arguidu hanesan funsionariu publiku iha ministeriu balu, no arguidu submete mai iha Tribunal husi parte Ministeriu Publiku (MP) promove ho krime Pekulatu de Uzu, tanba deskonfia uza kupon Governu nian hodi ba ense mina ba iha kareta privadu.
Iha despaisu Tribunal nian liu husi Juiz estajiadu Rozito Guterres deside aplika medida Aprezentasaun Periodika ba arguidu atu aprezenta aan iha Eskuadra Polisia neebe hela besik ba semana ida dala ida iha loron Segunda.
Tribunal aplika medida refere ba iha arguidu, hodi asegura arguidu ba iha prosesu investigasaun neebe sei lao hela.
Antes nee iha alegasaun Ministeriu Publiku solisita ba iha Tribunal atu aplika medida Termo Indentidade Rezidensia (TIR) no medida Aprezentasaun Periodika (AP) ba arguidu hodi hein prosesu investigasaun.
Aleinde husi parte defeza nian aseita ho alegasaun husi MP.
Prosesu nee prezide husi Juiz Rozito Guterres, Ministeriu Publiku reprezenta husi Prokurador Rafael Gusmao, arguidu hetan asistensia legal husi Defensor Publiku Marsal Mascarinhas.
Rekorda katak, iha loron Segunda (20/07/2026) Investigador Komisaun Anti Korrupsaun (KAK) husi Unidade Informasaun no Seguransa halao operasaun fragante de litu hodi kaptura no halo detensaun ba Funsionariu Publiku ho inisial JMdS.
Operasaun nee halao tamba suspeitu JMdS komete krimi pekulatu de uzu liu husi asaun uza senhas kombustivel governu ba iha kareta privadu iha estasaun mina Aitula Fuel Comoro Dili.
Hafoin halo prosesu identifikasaun, investigador KAK desidi hodi halo detensaun ba suspeitu JMdS durante 72 horas iha sela detensaun KAK Farol Dili, tamba hahalok neebe komete husi suspeitu deskonfia priense elementu krimi ba Pekulatu de Uzu tuir artigu 83 Lei Nu. 7/2020 Medidas Prevensaun no Kombate Korrupsaun (MPCC).
(ter)
