DILI, STLTIMORLESTE.com – Relasiona ho kazu neebe oknum membru FALINTIL-Forsa Defeza Timor Leste (F-FDTL) ida ho membru Polisia Nasional Timor Leste (PNTL) ida neebe hamosu dezentendimentu sei haree ninia solusaun.
Liafuan nee haktuir husi Xefe Estadu Maior Jeneral FALINTIL- Forsa Defeza Timor Leste (F-FDTL), Tenente Jenerál Domingos Raúl “Falur Rate Laek” ba jornalista sira Kuartel Jeneral F-FDTL Fatuhada, Dili, Kuarta (05/11/2025).
“Hau mos seidauk simu informasaun, hau foin mak tama, depois hau nia fatin neeba mos redi laiha neebe hau komunika la hetan. Hau foin too depois mak ita haree no ninia solusaun sei iha,” dehan nia.
Nia afirma, kazu neebe akontese iha area Postu Administrativu Matebian, Munisipíu Baukau nian neebe mosu dezentendimentu entre oknum membru F-FDTL ida ho membru PNTL. Instituisaun 2 nee sei haree ninia solusaun, tanba instituisaun rua nee servi ba nasaun no ba povu ida nee.
Antes nee Komadante Munisipiu Baukau, Superintendente João Sancho Pires deklara, kazu nee akontese iha loron 01 Novembru 2025 parte kalan bainhira membru F-FDTL insial O.G.D.C halimar hela biliar ho kondisaun lanu, neebe halimar biliar barulhu liu iha oras deskansa kalan nian, tanba nee membru Polisia sira ba hakalma, maibe membru F-FDTL refere halo agresaun fiziku simples hasoru membru Polisia insial C.
Jornalista: Jeniche da Costa
Editora: Domingas Gomes
