BAUKAU, STLTIMORLESTE.com – Durante tinan 20 resin Timor ukun aan, dezenvolvimentu infraestrutura bazika sira iha Munisipiu Baukau hahu lao diak, tanba esforsu husi Autoridade Munisipal.
Tuir joven rezistensia husi Suku Bahu, Postu Administrativu Baukau Vila, Adérito Domi katak, inisiu Timor ukun aan too iha tinan 2023, laiha implementasun projetu reabilitasaun no konstrusaun ba infraestrutura bazika sira iha Munisipiu Baukau, maibe hafoin Governu estabelese estrutura Autoridade Munisipal Baukau neebe liderada husi Veneranda Lemos, dezenvolvimentu infraestrutura bazika sira iha Munisipiu Baukau hahu lao, tanba esforsu masimu husi Autoridade Munisipal.
“Hau apresia tebes ba ukun nain sira neebe mak durante ukun Prezidente Autoridade lao mai nee mane deit mak ukun Baukau nee, maibe dezenvolvimentu sira la halo ita haree fila fali feto ida neebe ukun agora daudaun dezenvolvimentu lao iha Munisipiu Baukau,” Adérito Domi ba STL iha Vila Nova Baukau, Segunda (23/02/2026).
Nia sublina, Prezidente Autoridade Munisipiu Baukau atual liderada husi feto, maibe forte tebes, tanba nia esforsu sira koordena ho Governu Sentral liu husi Ministeriu relevante sira lori projetu sira hanesan reabilitasaun estrada diresaun husi Wailaka-Lanud, Ostiku-Venilale, estrada urbana Baukau Vila, konstrusaun merkadu Munisipal no projetu sira seluk tan neebe dauduan lao hela.
Nia komenta, husi implementa projetu hirak nee, unika implementa deit iha mandatu Prezidente Autoridade Veneranda Lemos, neebe konsege duni hatudu mudansa ba Munisipiu Baukau.
“Sim konsege halo duni mudansa neebe hau apresia nafatin Baukau hau hanoin feto mak bele ukun sai diak halo dezentendimentu,” Adérito katak.
Tuir jovem rezistensia nee katak, projetu reabilitasaun no konstrusaun sira neebe daudaun implementa nuudar istoria ida ba jerasaun foinsae, tanba iha faze ukun aan lori tinan naruk foin dezenvolvimentu ba infraestrutura bazika iha Baukau lao diak, maibe atu lao diak liu tan husu lider politiku hotu atu lalika haree husi partidu, maibe kopera malu atu nunee dezenvolvimentu lao diak liu tan iha Munisipiu Baukau.
Enkuantu Prezidente Autoridade Munisipiu (PAM) Baukau, Veneranda Lemos katak, projetu nasional hirak neebe daudaun implementa iha Munisipiu Baukau, laos esforsu mesak husi Autoridade Munisipal, maibe esforsu husi ema hotu-hotu neebe hetan kooperasaun masimu husi komunidade sira.
“Baukau nee laos PAM nian mesak, Baukau nee ema hotu nian neebe iha Baukau mai tuur iha Baukau ninia, mak ohin loron komunidade sira haree observa dezenvolvimentu lao iha Baukau laos PAM nia servisu mesak maibe ema hotu hotu neebe hola parte iha Makina Estadu no komunidade tomak mak kontribui,” Katak PAM Baukau.
Nia komenta, dezenvolvimentu sira neebe daudaun lao la signifika Autoridade Munisipiu Baukau mesak nia esforsu, maibe esforsu sira husi entidades tomak neebe iha konsensia kontribui no kopera ba prosesu sira. Nunee atu dezenvolvimentu sira lao diak liu tan iha Baukau husu entidades hotu liu liu komunidade sira nia kontribusaun no koperasaun tomak, tanba koperasaun no kontribusaun husi komunidade sira mak bele reforsa Autoridade Munisipal nia koordeansaun ho Governu Sentral deside projetu sira hodi implementa.
(tom)
