DILI, STLTIMORLESTE.com – Orsamentu Jeral Estadu (OJE) 2026 ho montante neebe boot kuaze bilhaun US$ 2 resin, maibe dezenvolvinentu no setor ekonomia iha rai laran marka pasu, tanba governante ka ministeriu neebe kaer infaestrutura la book aan.
Jerasaun Patriota, Marcos da Costa hatete, Ministeriu kompetente neebe kaer infraestrutura la book aan, maski besik tinan tolu governu ida nee kaer ukun.
“Hau hanoin orsamentu tinan 2026 montante boot, tanba nee ita tenke dezenvolve iha setor infraestrutura, atu nunee bele kria kampu servisu ba joven sira neebe dezempregu hela, laos maten hela iha fatin deit,” dehan Marcos da Costa ba STL iha Akait, Dili, Kinta (22/01/2026).
Nia dehan, agora tama ona ba fulan Janeiru tanba nee orsamentu neebe aloka ba setor sira neebe atu kria kampu servisu nee, governante sira sei bele book, importante ministeriu sira neebe kaer asuntu infraestrutura nee, tenke book aan, didika aan atu halo netik buat ruma hodi fo servisu ba joven sira.
Iha parte seluk Akademista UNDIL, Martinho de Carvalho hatete, maski OJE 2026 ho montante neebe boot, maibe liga ba ekonomia rai laran seidauk estavel.
“Hau hanoin orsamentu neebe atu finansia rekupera ekonomia rai laran, maka la ezekuta ho diak nee susar, tanba ita la haree investimentu direta ho in direta nee ita la haree, tanba nee ekonomia hanesan ema neebe moras todan tau hela soru, ita la hatene atu mate ka moris,” dehan Martinho.
(car)
