DILI, STLTIMORLESTE.com – Dezenvolvimentu setor agrikultura iha Timor Leste (TL) lao, maibe neineik liu.
“Ita haree dezenvolvimentu ekonomi liu-liu liga ba iha dezenvolvimentu agrikultura iha IX Governu haree katak dezenvolvimentu agrikultura lao neineik liu, tanba nee situasaun ba ita nia agrikultor sira oras nee daudaun haree katak komunidade iha area rural labele halo sira nia atividade hanesan agrikultor, tanba laiha apoiu neebe mak forte husi Ministeriu Agrikultura Pekuaria Peskas no Florestas (MAPPF),” Dekanu Fakuldade Ekonomia UNPAZ, Caetano C.Correia ba STL iha UNPAZ, Kuarta nee (14/1/2026).
Nia dehan, MAPPF presiza haree didiak asuntu neebe mak importante, tenke tau perioridade halo investimentu ba agrikultor nuudar autor liu husi formasaun, oinsa moderniza agrikultor iha munisipiu sira.
“Oras nee TL depende ba mina no gas hanesan rekursu ekonomiku, tanba nee Governu presiza identifika ita nia ekonomiku individu husi agrikultura, tanba agrikultura mak sai hanesan ruin ba iha ita nia ekonomia, maibe ita haree hanesan laloran, tanba laloran makaas nia baku too tasi ibun, maibe laloran laiha mak nia dada fali ba tasi klaran, tanba nee dezenvolvimentu agrikultura lao hanesan laloran, tanba nee MAPPF tenke tau perioridade” dehan nian,” nia esplika.
Nia sujere ba iha MAPPF tenke identifika fator importante sira neebe iha munisipiu sira, liu-liu ligadu ho agrikultor saida mak sira presiza no halo ida nee tenke lalais no akompanha, atu nunee bele promove sira nia atividade agrikultura iha munisipiu.
Mezmu MAPPF halo ona planu neebe diak, hodi fo sustentabilidade ba agrikultor sira bele moris ho diak, liu-liu mak apoiu sira treinamentu kapasita sira nia aan liu husi teknolojia neebe oras nee daudaun haree katak agrikultura tama ona iha era dijitalizasaun.
Nia dehan, liu husi eduka agrikultor sira iha munisipiu bele avansa tuir ona era globalisazaun neebe agora daudaun lao.
(joa)
