DILI, STLTIMORLESTE.com – Dezenvolvimentu iha Timor Leste (TL) sei hakdasak, tanba numeru dezempregu ho grau lisensiatura (S1) sira sei kontinua pineira rai henek iha mota laran.
“Ita konsidera dezenvolvimentu iha Timor Leste sei hakdasak, liu-liu laiha kampu trabalhu atu fo ba juventude dezempregu sira iha rai laran, hanesan ema grau lisensiatura sira mos servisu ba sira laiha, idak-idak hili desizaun ba servisu hanesan pineira rai henek,” dehan Estudante Lisensiatura, Anjolino Nunes ba jornalista sira iha Ponte Comunidades dos Países da Língua Portuguesa (CPLP) Komoro, Dili, Segunda (02/12/2024).
Nia dehan, servisu iha teritoriu Timor Leste bele dehan dezenvolvimentu ida nee hakdasak, tanba joven Timoroan neebe kuandu finaliza estudu hanesan grau lisensiatura sira kontinua ba servisu iha ema nia rain, liu-liu Australia, Korea, Inglatera no nasaun sira seluk.
Tanba saida mak joven Timoroan kontinua foti desizaun ba buka servisu iha ema nia nasaun, signifika kampu trabalhu iha Timor Leste laiha, nee hatudu duni katak dezenvolvimentu iha rai laran hakdasak ou lentu.
Iha fatin hanesan, estudante eskola iha universidade Oriental Timor Lorosa’e (UNITAL), Fernando da Silva afirma, hanesan estudante ida, maibe kona-ba servisu hanesan pineira rai henek ida nee mak sai forsa ida atu sustenta ba nesesidade uma laran.
Aleinde nee, komunidade pineira rai henek, Pedro Alves Lobato hatete, servisu pineira rai henek laos servisu ida neebe mamar, maibe nee todan, presiza uza ho iis forsa sira, hafoin pineira no suru, hafoin ema mai sosa, kuandu ema mai sosa mos tenke suru nafatin ba iha karreta trek laran.
Servisu ida nee todan, maibe nunka sente loron manas, nunka hakiduk, kosar metan sulin habokon isin lolon tomak, sunu vontade atu servisu liu tan, tanba obrigasaun husi nesesidade uma laran tenke servisu ida nee, nuudar pineira rai henek hodi sustentabiliza preokupasaun hotu-hotu.
(EST 1)
