DILI, STLTIMORLESTE.com – Tribunal Judisial Primeira Instansia Dili (TJPID) halao julgamentu ba arguidu ho inisial NdC no FdC, tanba komete krime hasoru lezadu DFdR.
Tuir faktus katak, iha loron 31 fulan Dezembru tinan 2023, arguidu sira nia aman ba iha ofendidu DFdR hodi tolok, tanba nee mak Lucia haruka nia fila ba uma.
Iha loron 1 fulan Janeiru tinan 2024, arguidu sira nia aman kontinua fila fali ba iha ofendidu nia uma hodi tolok, tanba nee mak ofendidu sai mai sira nain rua kaer malu riba ba rai.
Iha loron 2 fulan Janeiru tinan 2024, iha loraik arguidu nain rua hamutuk ho nia aman no sira nia mane foun ba iha ofendidu nia uma ho sasan kroat, arguidu NdC kaer besi, arguidu FdC kaer katana, no ofendidu sai hasoru ba sira dehan, se imi hakarak mai ita baku malu deit.
Arguidu NdC hakat ba baku kaer ofendidu, sira nain rua riba malu ba rai, halo ofendidu nia ain hetan kanek, la kleur arguidu FdC kaer katana maubeka ida halai ba atu taa ofendidu iha kakorok, maibe nia tahan ho liman hodi katana kona hetan kanek suku pontu 16.
Konsekuensia husi arguidu sira nia hahalok nee, halo lezadu sente moras iha fatin atinjidu.
Arguidu sira hatene katak, bainhira riba ema ba rai, no lori katana ta ema nia isin halo moras no kanek, maibe sira kontinua halo aktu nee.
Tanba nee Ministeriu Publiku akuza arguidu FdC komete krime Ofensa Integridade Fisika Simples no Arma Branka, tuir artigu 145 husi Kodigu Penal, no lei Arma Branka numeru 5/2017.
Arguidu NdC hanesan autor ba krime Ofensa Integridade Fisika Simples, neebe previstu iha artigu 145 husi Kodigu Penal.
Hatan ba akuzasaun nee, arguidu nain rua nega ba faktus, katak sira la lori katana taa ofendidu.
Sasin Evaristo Nunes hanesan Xefi Aldeia deklara katak, momentu neeba delegadu telefone dehan ema baku malu, tanba nee Xefi Aldeia mos ba hodi sori maibe sira la hapara problema.
Sasin deklara, nia sori netik maka inan feton nain rua neebe baku malu, depois sasin kontaktu ba Polisia no Polisia to mai maka sasin foin hare katana.
Sasin deklara, nia hare duni lezadu kanek, maibe se maka taa sasin la iha konesementu ida.
Rona tiha sasin, iha alegasaun Prokurador deklara katak, maske arguidu nain rua nega ba faktus, maibe MP mantein ho akuzasaun neebe iha. Tanba nee MP husu Tribunal atu tetu deklarasaun sira hotu, hodi aplika pena tuir konviksaun Tribunal nian.
Aleinde nee, Defeza husu Tribunal atu absolve arguidu nain rua, tanba la prense ba krime neebe iha.
Rona tiha alegasaun, Tribunal adia ba loron seluk hodi rona desizaun.
Audensia julgamentu nee prezide husi Juiz Koletivu Arjentino Nunes, Zulmira Auxiladora, Ivan Patrocenio, Ministeriu Publiku reprezenta husi Prokurador estajiadu nain ida, arguidu hetan asistensia legal husi Advogadu Privadu, Ismael Asunsao.
(ter)
