DILI, STLTIMORLESTE.com – Ohin Uma Kreda selebra solenidade Imaculada Conceição da Virgem Santa Maria, mahein Arkedioseze Dili nian, iha loron importante nee Maromak bolu no fihir tan joven nain 4 simu Ordenasaun Saserdotal mak hanesan Dc. Joanico Adelaide Ximenes Almeida, Dc. Jose da Silva dos Santos, Dc. Jose de Araujo da Costa no Dc. Mateus de Jesus Castro, nomos selebra tinan 26 Dom Virgilio Cardeal do Carmo da Silva, SDB moris nuudar Nailulik.
Misa nee prezidi husi Arsebispu Arkedioseze Metropolitana Dili, Dom Virgilio Cardeal do Carmo da Silva, SDB akompanha husi Dom Norberto do Amaral inklui amululik sira seluk.
Dom Virgilio hatete, iha loron 8 Dezembru Uma kreda selebra solenidade Imaculada Conceição mahein Arkedioseze Dili, maibe monu los iha loron Domingu, entaun selebrasaun nee muda ba ohin iha loron 7 Dezembru tinan nee.
Selebrasaun ohin selebra padroeira mahein Arkedioseze Dili nian mak Imaculada Conceição, sai mos hanesan padroeira ba rai Timor, tan nee festa ba Timor tomak ninian atu agradese ba Nai Nain Feto iha Inan sala laek Imaculada Conceição neebe kontinua sai mahein ba iha sarani, ba kreda no ba rai doben TL, tan nee loron ksolok ba sarani Timor.
“Iha loron solenidade Imaculada Conceição loron ksolok mos tanba razaun ida, ita simu grasa husi saserdosiu nian, tanba ho amululik nain 4 ninian saran aan ordenasaun Saserdotal grasa no bensaun ida husi Nai Maromak dala ida atu agradese,” hatete Dom Virgilio Cardeal do Carmo da Silva, SDB ba jornalista sira iha Salaun São José Katedral Dili, Sabadu nee (07/12/2024).
Bibi Atan Uma Kreda nee hatete, iha solenidade Imaculada Conceição nee laos deit ordenasaun Saserdotal, maibe iha mos selebra fidelidade ba Madres, Padres, Frater lubuk ida selebra tinan 50 nuudar konsagradu, konsagradas tinan 40 no 25 nuudar amululik sira selebra iha tinan 2024.
Maibe nuudar Igreja Timor fo Arkedioseze Dili, konvida sira hotu ohin sai momentu ida atu haksolok ba sira nia fidelidade.
Tan nee ohin depois de misa, sira hotu halo renovasaun votu, tanba nee loron nee sai espesial liu tan mak ho amululik foun nain 4 ninia ordenasaun midar bensaun no grasa ida ba Igreja Timor partikularmente ba Arkedioseze Dili.
Diakonu Joanico Adelaide Ximenes Alemida moris iha Dili, loron 20 Julhu 1988, oan husi Tomas Adelaide Pereira (Matebian) no inan Lourenco Correia Ximenes, husi Baukau Laga, Dc.Joanico oan dala uluk husi maun alin nain hitu.
Diakonu José da Silva dos Santos, moris iha Letefoho, moris iha 22 Julhu 1991, oan husi Afonso da Silva no Lucia de Carvalho, husi Letefoho, Dc.Jose oan dala ikus husi maun alin nain 8.
Diakonu José de Araujo da Costa, moris iha Maubisi Aituto, iha loron 5 Setembru 1990, oan husi Adelino da Costa no inan Adelina de Araujo husi Maubisi.
Diakonu Mateus de Jesus Castro, moris iha Poetete, Ermera, iha loron 12 Setembru 1990, oan husi José Soares no Julita de Jesus husi Poetete Ermera, Dc.Mateus oan dala lima husi maun alin nain 11.
Iha fatin hanesan, Reprezentante Familia, Estanisalau da Cruz Ximenes hatete, “ami nuudar aman inan hakarak hatoo hela mensajen badak ba Nailulik foun nain haat, ami aman inan nia mensajen mak nee, primeiru hadomi imi nia vida no knaar Nailulik too rohan ou too mate, ami inan aman reza no akompanha nafatin imi iha dalan vokasaun Saserdotal nian no misaun Nai Maromak nian, terseiru ami hakarak, imi presisa sai bibi Atan tan diak iha mundu ohin loron,” dehan nia.
Tamba mundu ohin loron mosu mai ho fenómeno oin-oin no hatudu sinais dos tempos neebe natural no artifisial, tanba nee imi tenke barani no fiar metin too rohan.
Partisipa iha misa nee husi familia Padre nain 4, Frater, sarani sira inklui Madre sira husi kongregasaun oin-oin.
(joa)
