DILI, STLTIMORLESTE.com – Iha Agostu 2026, Federasaun Atletizmu Timor Leste hamutuk ho federasaun ASEAN no federasaun mundial sei realiza Dili Maratona.
Kestaun nee hatoo husi Prezidente Federasaun Timor Leste Atletizmu, Afranio Savier Amaral ba jornalista sira, bainhira remata halo enkontru ho Prezidente Republika Jose Ramos Horta iha Palasiu Prezidensial Nicolau Lobato, Bairo Pite, Kuarta (05/11/2025).
Nia hatete, loron hirak liu ba hetan konvite ofisial husi Xefe Caza Sivil no ohin sira bele hasoru malu ho Prezidente Republika Jose Ramos Horta.
Nia hatete, sira sei prepara programa no planu neebe Prezidente deside fisku no labele muda, neebe sei realiza iha Agosto segundu semana 2026.
“Iha Agostu 2026 segundu semana ami sei realiza Dili Internasional Maratona neebe mak sei serbisu hamutuk ho federasaun ASEAN no federasaun mundial, nunee data nee labele muda. Durante nee muda data ba mai, maibe Nain Prezidente lakohi muda, hakarak define klaru tuir orientasaun federasaun internasional nian, tanba Dili Maratona sai ona kalendariu permanente neebe akompanha husi mundu tomak,” dehan nia.
Nia katak, se muda data ba mai ema sei la ladun masimu hodi partisipa eventu Dili Internasional Maratona, tanba Maratona iha mundu tomak ema nia data nee seklu ba seklu ona nunka muda, maibe Timor Leste nia tuir orsamentu karik iha realiza eventu nee maibe laiha i lahalo.
“Tanba nee Prezidente hakarak data nee fiksu no labele para iha dalan, no atividade nee realiza iha segundu semana, Agostu 2026 haree iha loron Sabadu, tanba nee ami sei prepara dokumentus hotu hotu no programa hotu hotu sei mai entrega ba iha nai Prezidente nunee bele akompanha prosesu tomak,” dehan nia.
Nia haktuir tan, realiza Dili Maratona ba tinan 2026 laiha tema seluk mak Dili Maratona deit, uluk mak halai ba Palestina maibe agora la uza ona tema seluk naran mak Dili Maratona, tanba Dili Maratona nee kalendariu reprezenta, tanba Dili nee kapital Timor Leste no Dili nee sai hanesan ikon ida iha mundu internasional.
Iha biban nee Prezidente Republika Jose Ramos Horta hatoo rekomendasaun ba atletizmu no siklizmu prepara planu no orsamentu submeter no Prezidente Republika sei deside tuir planu neebe iha.
Husu atletizmu no siklizmu atu mobiliza atividade nee ho didiak no kopera ho marketing neebe mak iha no vizaun diak ba mobiliza marketing neebe diak forte iha nasional no internasional no marketing forte bele atrai ema bele fo fiar no bele investe iha atividade Dili Maratona.
Jornalista: Emerenciana Pinto
Editora: Domingas Gomes
