BAUKAU, STLTIMORLESTE.com – Dioseze Baukau selebra misa solenidade ba São Jose, neebe mos nuudar mahein ba Dioseze Baukau halo ona tinan 29.
Bispu Dioseze Baukau, Dom Leandro Maria Alves espika, loron 19 Marsu nuudar loron importante ba Igreja Katolika iha mundu hodi selebra misa solenidade São Jose nian neebe nuudar Santu ida fiar iha Maromak hodi kuida Maria Virjen neebe Maromak indika sai inan ba Jesus Kristu.
“Ohin Dioseze Baukau solenidade tuir kalendariu liturjika nian solenidade São Jose neebe Igreja iha mundu tomak selebra festa boot, maibe espesial ba Baukau hanesan padrueru Dioseze nian, tan nee Baukau selebra ba 29 anus,” hateten Dom Leandro hafoin remata misa solene iha Katedral Santo Antonio Vila Antiga Baukau, Kuarta (19/03/2025).
Nia sublina, São Jose mahein ba Dioseze Baukau tinan nee selebra aniversariu ba dala 29 neebe sarani no Padre Parokia sira husi Dioseze Baukau konsentra selebra misa hodi agradese ba Maromak nia grasa neebe haraik ba sarani sira liu husi São Jose.
Bispu Dioseze nee argumenta, liu husi protesaun São Jose nian ba Dioseze mak sarani sira kontinua buras no hakat ba oin nafatin, nunee husu sarani atu hatudu nafatin maturidade iha fiar moris nian.
“Iha selebrasaun 29 anus nee husu ba sarani hatudu ita nia maturidade ida nee mak importante, fiar tenke hatudu sai iha ita nia hahalok domin, perdua malu no haree malu diak, ida nee mak importante,” Dom Leandro rekomenda.
Bibi Atan Dioseze Baukau nee rekonhese, durante tinan 29 Dioseze Baukau hasoru difikuldade liu-liu menus rekursu hanesan Padre no Madre hodi selebra misa iha nivel Igreja sira pertense iha Dioseze Baukau.
“Iha difikuldade, bainhira ita tuun ba halo pastoral sarani sira sempre husu atu haruka nai lulik no madre sira atu hakbesik aan ba sira, ida nee difikuldade neebe ita iha, tanba ita nia nai lulik sira la too,” informa Dom Leandro.
Tuir Dom Leandro katak, iha selebrasaun tinan 29 Dioseze Baukau hakarak responde preokupasaun refere liu husi koloka Padre no Madre sira iha kada Igreja hodi haklaken liafuan Maromak ba sarani sira, maibe too agora Dioseze seidauk bele hatan, tanba menus Padre no Madre.
Nunee Dom Leandro husu sarani sira atu nafatin harohan ba Maromak hodi bele iha solusaun ba preokupasaun refere neebe Diozese enfrenta.
Enkuantu tuir sarani husi Parokia Santo Antonio Vila Antiga, Oracio Barboza sente haksolok, tanba Igreja desidi São Jose sai mahein ba Dioseze Baukau neebe bele motiva sarani sira hodi banati tuir iha moris fiar nian.
“Hau nia hakarak oinsa mak Dioseze Baukau nee buras nafatin, presiza rona malu, tanba ida nee mak knaar importante ba ema sarani ka fiar nain iha uma Kreda Katolika,” hateten Oracio.
Entretantu misa solenidade ba São Jose nee prezide direita husi Bispu Dioseze Baukau akompanha husi Padre Parokia no Marde sira neebe hetan partisipasaun masimu husi Autoridade Munisipiu no Postu inklui komunidade sarani Katoliku no estudante sira.
(tom)
