DILI, STLTIMORLESTE.com – Diretor Servisu Edukasaun Munisipiu Likisa nafatin halo koordenasaun servisu ho parte eskola sira neebe lokaliza iha Munisipiu Likisa.
Julio da Silva hanesan Diretor Servisu Edukasaun Munisipiu Likisa ba jornalista STL liu husi telefone, Kinta nee (22/05/2025).
“Hau hanoin liga ba relasaun sira nee, ami nian relasaun neebe mak diak tebes ho ita nian eskola sira hotu, ita halo linha koordenasaun kualker orientasaun hotu neebe mak iha nível nasional munisipal, ita sei informa hotu ba eskola sira, tanba nee ita nian linha koordenasaun nee lao diak hanesan baibain,” dehan Julio.
Nia hatutan, servisu hotu atu lao ho diak importante mak tenke koopera malu, oinsa koordena ho parte eskola sira hodi fo informasaun ba malu liga ho servisu nian, tenke hatoo ba malu para Edukasaun Munidipal bele relata ba iha Edukasaun Nasional.
Iha fatin seluk, Patricio da Costa Magno hanesan Diretor Servisu Edukasaun Munisipiu Ainaro hatete, Servisu Edukasaun Munisipiu Ainaro nafatin halo koordenasaun servisu ho Lideransa Eskola hanesan Diretor Eskola sira importante tebes-tebes.
“Nuudar Diretor Edukasaun Munisipal Ainaro nafatin halo koordenasaun servisu ho ita nian lideransa husi eskola sira neebe lokaliza iha Munisipiu Ainaro nia laran, tanba linha koordenasaun nee importante tebes-tebes, iha asuntu importante ruma presiza fo informasaun ba malu no difikuldade saida deit mak eskola sira hasoru nee tenke fo informasaun, tanba nee iha koordenasaun neebe diak ho ita nian diretor eskola sira,” dehan nia.
Entretantu Patricio da Cruz Quintao hanesan Diretor Servisu Edukasaun Munisipiu Manatuto hatete, linha koordenasaun ho Diretor Eskola sira nee diak, tanba sira sempre halo kontaktu liu husi grupu edukasaun ninia.
“Ita sempre halo kontaktu iha grupu edukasaun ninia, dala ruma mos ita liu husi enkontru sira nee ita fo informasaun importante sira, liu-liu liga ba servisu ninia, nee tenke fo hatene ba malu, ho nunee bele relata ba iha nasional,” katak nia.
(jac)
